Tamara Suju, director ehecutivo di e centro di estudio pa America Latino (Casla), a indica cu den e proximo dianan lo conoce e informe cu e organisacion di Estadonan Americano (OEA) ta realisa pa denuncia e violacion di derecho humano na Venezuela na corte penal internacional na Den Haag, Hulanda.
E abogado a sigura cu si e secretario general di OEA, Luis Almagro, logra cu un pais ta apoya e denuncia, e fiscal general di e Corte Penal Internacional tin e obligacion di inicia un investigacion contra estado Venezolano.
“Esey lo significa cu e fiscal por dicta na cualkier momento di e investigacion, orden di detencion contra funcionario di e gobierno”, Suju a bisa den entrevista cu El Nacional Web.
Suju a destaca cu tur organismo internacional mester traha den funcion di logra realisa un investigacion contra gobierno di Maduro.
“Si tin algo di cual e funcionarionan di gobierno Venezolano tin miedo, ta di husticia internacional, pasobra husticia nacional nan tin totalmente secuestra”, el a sigura.
E abogado den derecho penal a considera cu gobierno ta uza e presonan politico solamente como ficha di cambio pa negocia y hiba oposicion na su tereno.
“No ta importa gobierno e presonan politico. Si e regimen no ta preocupa cu tin mucha ta muri di desnutricion, cu persona ta muri di cancer o cu baby recien naci ta muri pa falta di medicina, kico lo ta importa nan preso politico”, el a señala.
El a exhorta e Venezolanonan pa denuncia tur loke ta sucede cu nan familiarnan deteni. Ademas, el a solicita na comunidad internacional, na Union Europeo y e paisnan di Latino America pa sanciona e funcionarionan di e gobierno.
“Mi ta pidi e estadonan miembro di e statuto di Roma y di e corte penal internacional pa nan mira loke ta pasa na Venezuela. Tin hambruna, crisis humanitario y crimen contra humanidad, tres di e delitonan pa cual por invoca un intervencion humanitario”, Suju a declara.
