A saca como ocho tonelada di oro di Banco Central di Venezuela den luna di april pa presuntamente ser bendi den exterior, asina un diputado di Asamblea Nacional y un fuente di e regimen, al tanto di e asunto, a relata, despues cu un cantidad similar a sali di e reservanan di Banco Central na februari pasa.
E baranan, parti di e reservanan internacional cu e entidad tin warda, a ser saca di Banco na momento cu ta trahando cu un minimo di personal, e mayoria ta di management, pa e problema di suministro di awa den e oficinanan, segun un fuente di gobierno cu a pidi mantene anonimato.
Di acuerdo cu parlamentario Angel Alvarado y e fuente di regimen di Maduro, cu e ultimo accion aki lo a saca como 24 tonelada di oro desde januari di e aña aki. Banco tin ainda alrededor di 100 tonelada den nan bodeganan, segun e fuente di gobierno.
Banco Central di Venezuela (BCV) y ministerio di Comunicacion no a responde riba solicitud di comentario.
E benta di e baranan ta un di e poco maneranan cu regimen di Nicolas Maduro tin ainda pa obtene placa cash, mirando e caida drastico den produccion di petroleo y e sancionnan imponi a Estadonan Uni, loke a restringi e financiamento internacional.
Den su intentonan pa presiona Maduro pa e bandona poder, Washington a urgi na januari e cumpradonan internacional di oro pa stop di haci negoshi cu e dictadura.
Despues di e pedido Mericano, BCV mester a suspende benta di 15 tonelada. Pero na februari y maart autoridadnan di Banco a sigui autorisa e benta, segun e fuente oficial, ken a agrega cu nan tabata sacando e baranan na cantidad chikito.
