E principal facilitado di e negociacion entre gobierno y oposicion di Venezuela, gobierno di Noruega, a minimalisa e peso di e decision di Nicolas Maduro di no participa e siman aki na un ronda nobo di dialogo na Barbados.
Den un entrevista cu The Associated Press, Dag Nylander, di Ministerio di Asunto Exterior di Noruega, a bisa cu e ta den contacto cu ambos partido pa haya un fecha nobo pa reanuda combersacion cu ta trata di habri un proceso di dialogo y logra un salida pacifico pa e crisis Venezolano.
Maduro a bisa diaranson anochi cu el a dicidi di no manda delegado pa Barbados, unda lo a reanuda combersacion ayera, como protesta pa e decision di gobierno Mericano pa congela tur activo di gobierno Venezolano na Merca. Tambe e mandatario a dicidi di somete e mecanismo di e combersacion na un revision.
“Noruega ta facilitando e proceso di negociacion, riba solicitud di e principal actornan politico na Venezuela y ta programa tur e reunionnan den funcion di e disponibilidad di e partidonan,” Nylander a declara. “Nos ta den contacto cu nan pa loke ta e proximo reunionnan. E facilitacion ta continua bao e principio di cu e partidonan mester gusta y cu tin perspectiva realista, di un solucion negocia cu por beneficia pueblo Venezolano.”
