Imagina un scenario den cual e coronavirus nobo ta yega Venezuela y ta supone cu esaki ta pone un alerta grandi pa personal di e centronan di salud. Lo ta un emergencia mas dentro di un sistema debilita. “Den contexto di yegada di e un virus mi no kier duna proyeccion, pero e impacto lo ta grandi, ya cu e recursonan ta precario,” presidente di Sociedad Venezolano di Infectologia, Maria Graciela Lopez, a declara.
Pa Jose Oletta, ex-ministro di Sanidad y Asistencia Social, e actual sistema di salud ta precario: “E ta extremadamente debil, e no por atende asunto diario, mucho menos un situacion di emergencia manera un enfermedad emergente asina.”
Por ehemplo, e servicio di Terapia Intensivo di e principal hospital pediatrico di Venezuela ta cera tecnicamente desde 27 di februari. “Esaki ta un imagen di loke ta pasando na e demas unidadnan di terapia intensivo tambe,” Lopez ta sigura.
“Nos ta haya nos man mara,” Margott Monasterio ta declara, enfermera y representante sindical di Hospital Universitario di Caracas (HUC) di Universidad Central di Venezuela. Esaki ta e prome hospital y e centro specialisa mas grandi di e ciudad.
Nacionnan Uni, den su reporte di 17 di februari encuanto Venezuela, a bisa cu den cuatro aña mita di e empresanan transnacional productor di medicamento a retira di e pais y como 25% di e talento humano a migra di sector publico pa sector priva of a bay exterior. A causa di e blackout grandi di maart 2019, mas di 30% di e ekiponan medico a sufri daño, sin cu te fecha di awe a logra drecha nan 100%.
Cifranan di e sistema di salud ta demostra e crisis agudo sanitario den cual e pais ta. Na 2019 al menos 70 % di e centronan a ricibi suministro di awa un o dos bes pa siman, asina Encuesta Nacional di Hospitalnan a indica. Mientras cu 63 % a reporta fayo den servicio di electricidad, e estudio a registra 164 morto atribui na e fayonan.
