Venezuela no ta laga repatria nan propio ciudadano; Personanan cu a huy di GNC no ta un peliger

Un biaha mas cinco detenido ilegal a huy for di Guarda Nos Costa (GNC). Segun minister di Husticia, Andin Bikker, e situacion aki a bira un reto debi cu Venezuela no ta permiti pa Aruba repatria nan propio ciudadano.

Pero despues cu e situacion di Covid, gobierno di Venezuela a dicidi di nenga entrada di nan propio ciudadano. Esaki ta dificulta pa Aruba por repatria e personanan ilegal. Un punto preocupante ta keda cu actualmente entre e personanan deteni tin un grupo di 20 persona cu tabata cera den KIA y cu ya caba nan a cumpli nan condena.

Awor nan ta cera den instalacion di GNC pa lunanan caba wardando pa nan deportacion. E instalacion aki no tin capacidad pa retene personanan pa periodo largo, entre nan personanan cu a comete crimen violento. Antes e personanan aki, unabes cu nan a sali for di KIA, e mesun dia of su mañan, nan tabata wordo deporta.

Segun e mandatario, Hulanda a wordo poni na conocemento di e situacion aki caba, pero te ainda e problema t’ey. E ta mira cu e solucion mas efectivo ta pa e frontera cu Venezuela pa repatria nan ciudadano, por habri mas pronto posibel. Pasobra den un vuelo nos por transporta un gran cantidad di persona cu ta cera den GNC, y e sistema ta haya menos presion riba dje.

Te ainda e personanan cu a huy no a keda deteni. Apersar cu den instalacion di GNC tin personanan cu tabata cera den KIA, esun cu a huy no ta persona cu tin un record criminal. Segun minister su conocemento, nan no a representa un menasa pa ordo publico. Nan ta persona cu tabata deteni pasobra nan tabata traha sin permiso.

E tipo di situacion aki cu nos ta pasando aden no tabata wordo presenta, ni sikiera ora cu e frontera entre ambos pais a keda cera, ya cu nan tabata permiti cierto vuelo pa repatria nan. E personanan tabata keda deteni maximo un par di siman pa deporte na nan pais di procedencia. Aworaki tin un over poblacion, ya cu no tin forma pa deporta e personanan aki cu a falta nos ley di admision y expulsion (LTU).

E situacion di huida di for di GNC ta keda un preocupacion y segun e mandatario, nan ta busca forma pa atende cune. Nan ta renobando, ampliando y optimalisando nan sistema di siguridad den e facilidad unda nan ta keda deteni.

Igualmente den cuadro di e Cumbre di Husticia, minister Bikker a laga sa cu el a haci un apelacion na su colega di Hulanda pa gobierno di Hulandes intermedia pa Aruba por haya apertura cu Venezuela pa repatria e personanan aki.

Tambe el a bisa cu GNC ta corto di personal. P’esey gobierno ta haciendo uzo di overplace urgente pa nan amplia e personal na GNC. E ta haya cu esaki e forma pa contene e situacion, te ora cu lo bin un apertura na nivel diplomatico di Reino Hulandes y Venezuela cu ta habri caminda pa bin cu vuelonan pa deporta e personanan aki.