Segun declaracion di Emigdio Palumbo, Presidente di Camara di Carga Pisa, pronostico no ta mehorando pa e chauffeurnan di truck di La Guaira, ya cu e constante fluctuacion di dollar tin nan contra muraya.
“Nos ta decai. Cada dia tin menos trabao y menos material pa traha cune, y cu esey menos posibilidad di garantisa mantencion di e vehiculonan,” el a conta. Aunke el a bisa di ta consciente di e hiperinflacion cu ta afecta e pais, el a manifesta cu e no ta comprende con e prijsnan na dollar tambe ta keda aumenta constantemente.
E ta señala cu nan mester a ahusta flete na dollar, pa cual un biahe pa Gran Caracas a bira entre $ 250 y $ 300 pa sobrevivi. “Pero ya ni e dollar ta suficiente. Un tire ta costa awe $250 y mañan e ta sali na $ 350. Tur cos ta calcula a base di moneda stranhero.”
Palumbo a lamenta cu, di mas di 2.500 truck cu tabata opera den e estado, si acaso nan yega awor na 100 ta hopi, aunke no tur den condicion optimal. Tin ora ta sali un biahe pa Maracaibo, pero cu tire completamente liso.”
E principal importador ta estado Venezolano, cu mayoritariamente ta trece alimento. “Importacion priva ta masha poco. Nos principal mercado na actualidad ta den Gran Caracas, aunke den añanan anterior nos tabata bay te Brasil y Colombia, pasobra e Mack y Iveconan tabata permiti esey. Awor e trucknan den bon condicion cu bo ta mira riba caminda no ta di nos, ta vehiculo cu ta bin di frontera cu mercancia.”
