Mester prepara pa sigui nos caminda
Venezuela no ta bolbe na mesa, esey ta e conclusion despues di scucha palabranan di nos prome ministro, pero tambe tumando na cuenta e sucesonan na nivel internacional. Union Europeo, cu participacion Hulandes, a caba di tuma sancion extra contra Venezuela, principalmente contra lidernan importante di e regimen, cu excepcion di presidente Maduro mes. E storia ta cu esey ta pa e por biaha si e situacion di negociacion por exigi esaki, cu otro palabra, no kier cera tur porta tampoco. Berdad ta cu nos no ta kere tanto den e version aki. Cu denuncia haci caba na corte internacional di husticia pa violacion di derecho humano, ademas di e crimennan cometi siman pasa, cu ta encera ehecucion extrahudicial practica riba mayoria di e personanan cu tabata conforma e grupo di Oscar Perez, incluyendo e mes. Esaki no ta nada nobo, pasobra pa añanan largo e represion, persecucion, aresto arbitrario, tortura, y ehecucion extrahudicial aki den un sin fin di caso ta practica comun. No lo tin hopi pais via cual Nicolas Maduro lo por biaha mas, aparte cu e tin suficiente problema na cas, unda e conflicto entre e Chavistanan ta birando mas serio.
No ta pornada e ex embahador na Nacionnan Uni, y ex-presidente di Pdvsa, Rafael Ramirez, ta purba logra un tipo di eleccion primaria entre Chavista, pa eligi e persona cu ta bira e candidato di PSUV pa proximo eleccion. Naturalmente e no ta bay haya ningun sorto di garantia pa por bolbe, pasobra husticia di e pais, si por uza e palabra aki ainda pa e sistema macabro cu e delincuentenan a crea, tin su persona condena caba prome cu e huicio tuma luga. Tur esaki ta parti di e pleito entre compañero den crimen cu a cuminsa culpa otro awor cu e situacion na Venezuela a bira sumamente dificil, y no solamente pa e pueblo, sino tambe pa e rank and file entre polis y militarnan, cu tambe tin famia pa cria.
Loke si por bay sucede awor ta cu e conflicto cu Europa ta escala, cu Venezuela por ehemplo tumando paso pa expulsa diplomatico Europeo o hasta cera embahada. Esaki por tin consecuencia pa nos tambe, pasobra e ora si biahamento den e pais sin ley aki ta bira un riesgo hopi grandi mes, sin embahada pa atende bo.
Anto, si e conclusion ta cu no lo tin cambio por lo pronto, nos lo mester haci loke nos mester haci den e situacion aki. Pa cuminsa, stop di dramatisa e situacion di abastecemento for di Venezuela. Hasta den fruta y berdura mes, loke tabata bin di Venezuela ta djis un fraccion di loke nos ta importa anualmente. Ta ridiculo di lesa den Algemeen Dagblad di poco dia pasa cu “E rekinan den e supermercadonan na Aruba, Bonaire y Curaçao ta bira dia pa dia mas bashi. Desde cu e presidente Venezolano a cera e fronteranan cu Caribe Hulandes pa 72 ora, e suministro di producto fresco a tranca.” Nos cu ta biba aki mes ta kere e cosnan aki? Cuanto di nos ta cumpra fruta y berdura cu ta sali di Venezuela, cu ta ademas nada otro cu probecha di un situacion particular na e pais ey, cu no ta bay dura tampoco. Un gran parti di loke nos ta cumpra aki ta bin den container refrigera di otro fuente. Nos mester djis crea e comercio cu e paisnan aki pa substitui e parti cu tabata e importacion di Venezuela aki.
Nos ta tende tambe bosnan cu ta haci un yamada pa nos corda riba e produccion propio, cu lo por haya un estimulo den e situacion aki. No cu nos kier desanima esaki, pero a corto plaso ta dificil pa crea un sector di agricultura, miho nos papia di horticultura, exitoso, mirando e adversidadnan grandi cu ta existi aki pa loke ta agri/horticultura. No cu e ta imposibel, pero nos no ta mira ni tende niun hende ta papia di kico ta factibel y kico nos no mester cuminsa mes, pasobra nan no tin futuro den nos clima, den nos condicionnan.
Y asina mes, un sector exitoso di horticultura lo no ta mas cu un porciento, o un par, di e consumo total di fruta y berdura cu nos poblacion, y e dies mil di turista presente tur dia ta come. Esey no ta motibo pa no hacie, pero nos no mester cay den politica barata, haciendo hende kere cu ta milagro nos ta bay haci cu agricultura aki. Pa djis duna un hecho historico: den inicio di siglo 20, cu Aruba tabata conta cu menos di 10.000 habitante, y tabatin tur tereno bon pa agricultura disponibel, no tabata posibel pa cria e poblacion ey. Awor, cu 120.000 habitante plus turista, y mayoria di e terenonan fertil planta na vivienda, ta kico ta e perspectiva real di esaki?
E paso realistico ta cu, mescos cu (practicamente) tur cos cu nos ta uza o come, ta bin di exterior, mester establece e contactonan pa compensa pa loke no ta bin di e pais Bolivariano mas. Y mas a largo plaso ta bon pa cuminsa papia di plannan realistico di produccion agricola propio, cu e observacionnan haci aki den mente.
