Desde e reunion di diabierna pasa na Aruba pa soluciona e problema cu Venezuela y specificamente pa habri e fronteranan bek, e situacion a keda igual.
Te ayera nochi (ora e edicion aki a cera) Venezuela no a reacciona ainda riba documento, cu segun gobierno di Aruba ta un acuerdo den concepto.
Niun pais a informa un reaccion oficial riba e documento ainda. Gobierno di Aruba a laga a ayera solamente cu e documento no ta firma. Asina e ceramento entre Venezuela y e islanan di ABC a keda vigente. E contenido di e documento no ta conoci. Prome minister di Aruba Evelyn Wever-Croes a bisa diabierna pasa cu a haci palabracionnan pa combati e contrabanda entre Aruba y Venezuela pero tambe mas palabracionnan, unda duana ta envolvi. Mas detaye e no a duna.
Manera nos a publica ayera, fraccion di AVP kier cu prome minister ta bin parlamento pa duna un splicacion oficial di e situacion y tambe di e contenido di e documento di ‘acuerdo’. “Den su tarea pa controla gobierno, esaki obviamente no ta e canal apropia pa ricibi dato ni tampoco informacion. Ni presidente di parlamento a ricibi informacion oficial como representante di e organo di cual nos ta forma parti di dje”, asina parlamentario Richard Arend (AVP) a expresa.
