Nicolas Maduro a ricibi diahuebs pasa e delegacionnan perteneciente na e Grupo Internacional di Contacto na Palacio Miraflores na Caracas, pa combersa cu nan pa busca un salida di e crisis politico na Venezuela.
E canal Chavista VTV a transmiti imagen di e yegada di e mision na palacio presidencial, unda canciyer Jorge Arreaza a ricibi nan.
Segun Maduro a indica riba su cuenta di Twitter, e reunion tabata pa “informa di e consecuencianan di e blokeo y e sancionnan imponi pa e imperio Mericano contra Venezuela.”
Den e mision aki tabatin representante di Alemania, Spaña, Francia, Italia, Portugal y Hulanda, tur ta miembro di e grupo internacional di contacto di cual tambe ta forma parti Suecia, Reino Uni, Costa Rica, Uruguay, Ecuador y Bolivia.
E agenda di e mision no ta conoci, pero e mesun dia lo tabatin un encuentro cu e hefe di Asamblea Nacional, Juan Guaido, reconoci como presidente encarga di Venezuela pa mas di cincuenta pais.
Den ultimo siman embahador y representantenan di e paisnan Europeo miembro di e grupo a tene varios encuentro cu dirigente politico di ambos banda, pa combersa riba e intentonan di e grupo.
E Grupo di Contacto a keda conforma riba iniciativa di Union Europeo (UE) y tin como meta promove un salida pacifico di e crisis Venezolano mediante eleccion presidencial nobo y e distribucion di ayudo humanitario.
E bishita ta coincidi tambe cu e inicio di combersacion na Noruega entre gobierno di Maduro y oposicion reuni tras di Juan Guaido, cu por conduci na inicio di un dialogo nobo.
