E exodo di Venezolano ta un negoshi di miyones pa e rednan di funcionario cu ta comercialisa e asunto di paspoort pa miles di dollar, segun e corant Spaño El Pais.
E refugiado Julián Quiara ta parce di ta papia den serio ora e bisa cu “Prome cu nan deporta mi pa Venezuela, mi ta tira mi curpa na lama cu un piedra mara na mi pia.” Quiara, di 42 aña, tin motibo pa tin miedo. Te nuebe luna pasa, e tabata traha pa Saime (Servicio Administrativo di Identificacion, Migracion y Stranheria) den e Torre Aco, e edificio na parti oriental di Caracas unda un mafia di funcionario corupto ta opera, cu ta cobra miles di dollar a cambio di un paspoort, un di e negoshinan mas beneficioso den un pais ruina.
Na april Quiara a subi un avion pa huy pa Spaña, unda e tin famia. El a pidi asilo. Y ta sigura cu el a haya menasa di su superiornan pasobra e no tabata kier a colabora den e benta di e documentonan di identidad.
Memey di un exodo sin precedente, hopi Venezolano cu ta desea di huy di hambruna, delincuencia y caos den cual e regimen di Nicolas Maduro a degenera e pais. Y nan tin mas di un aña ta warda riba un paspoort via e caminda oficial, pero esunnan cu por y ta desea di paga miles di dollar na e funcionarionan corupto di Saime, ta haya nan documentonan rapidamente, segun victima, funcionario y ex funcionarionan di gobierno Venezolano y intermediarionan di e trafico ilegal aki.
Frenando e emision di paspoort, oposicion ta kere cu gobierno ta busca pa nenga e derecho di voto na mas di dos miyon Venezolano cu nan ta calcula cu tin den diaspora. E teoria ey ta basa riba e hecho cu Caracas ta uza e paspoortnan pa castiga e poblacion critico. E autoridadnan a retira e documento di diputado, artista y periodista.
“No ta casualidad cu esaki ta pasa prome cu eleccion presidencial”, Lester Toledo, un lider opositor di partido boluntad popular ta argumenta, cu awor ta residencia na Madrid. Maduro lo busca su reeleccion den eleccion prome cu fin di april.
Pa loke ta esunnan cu ta sigui warda un documento di biahe na Venezuela pa por emigra, algun ta kere cu gobierno na Caracas ta purba di contene nan salida. A pesar di esey, miles di Venezolano ta huy na pia yegando Cucuta, Colombia, via e brug Simon Bolívar, unda hopi ta haci uzo di un tarheta di mobilidad di frontera.
Na Europa, Estadonan Uni y America Latino hopi Venezolano a keda indocumenta wardando nan paspoort, loke a causa perdida di empleo, separacion familiar y miedo di deportacion.
