Presidencia Encarga di Venezuela, designa pa Asamblea Nacional, a anuncia fin di e encuentro di mediacion cu e representantenan di gobierno di Nicolas Maduro na Oslo, Noruega, sin un acuerdo, y sin cu esaki ta significa “detene esfuersonan den tur ambito constitucional.”
Den un comunicado emiti ayera, ta laga sa cu durante e mediacion auspicia pa gobierno di Noruega, “nos a ratifica e: fin di usurpacion, gobierno di transicion y eleccion liber,” como e caminda pa soluciona e situacion critico di e pais.”
Den e comunicado a ripiti e yamada na Forsa Arma pa soluciona e crisis na Venezuela, basa riba “restitui e orden constitucional y logra cu e Venezolanonan por dicidi nan destino den eleccion liber, observabel y verificabel.” Tambe un yamada na tur sector di e pais pa contribui na e obhetivo y den construccion di e garantianan necesario.
Observadornan no ta mira e fin di e reunionnan sin un fecha nobo di encuentro necesariamente como fin di e contactonan a traves di Noruega, o cu por tin intento pa negocia. Segun e medio Spaño ALnavio, un fuente involucra den e negociacion na Oslo a declara cu “nos lo insisti, siempre y cuando nos ta calcula cu tin posibilidad pa un solucion acorda.”
Pero ta keda sorprendente cu a papia, tres biaha hasta cara a cara. E comunicado di gobierno Noruego ta bisa entre otro: “E partidonan a demostra nan boluntad di avansa den e buskeda di un solucion acorda y constitucional pa e pais, cu ta inclui asuntonan politico, economico y electoral.”
A keda cla cu e opcion a keda riba mesa, y cu contrario na loke a pensa, no a papia di e tema electoral so, sino tambe di aspecto institucional manera Forsanan Arma, Tribunal Supremo di Husticia, Conseho Nacional Electoral, y e crisis economico y social. E ultimo aki a keda confirma pa e publicacion di estadistica pa Banco Central di Venezuela a caba di publica pa prome biaha den tres aña; un reconocimento di e regimen cu ta existi un crisis.
