Den ultimo tempo e medio cu mas a trece noticia di primicia y corecto tocante e negociacion entre gobierno di Maduro y esun di presidente interino Juan Guaido, tabata e medio Spaño AlNavio. E siguiente articulo ta un traduccion di gran parti di nan analisis di momento di e situacion di negociacion na Barbados.
E delegacion di Juan Guaido ta mantene e hermetismo cu Noruega ta exigi y regimen di Maduro ta pura pa papia. Jorge Rodriguez, ministro di Comunicacion di Nicolas Maduro, a bisa cu e negociacion na Barbados tabata ‘un exitoso intercambio’, di cual por deduci cu nan lo sigui conversa. Tabata spera cu e tercer ronda di conversacion lo tabatin resultado y ya e tabatin uno caba: cu e negociacion ta continua. Tambe e apoyo cu Estadonan Uni a duna a traves di un portavoz di Departamento di Estado ta yuda e negociacion.
Den declaracion na agencia EFE, y bao condicion di anonimato, un portavoz di Departamento di Estado a bisa cu ‘ta apoya tur esfuerso pa restaura democracia y alivia sufrimento di e Venezolanonan y e carga di e crisis pa e region’. Despues cu Grupo di Lima, Union Europeo, Vaticano, Nacionnan Uni, Michelle Bachelet, China, Rusia y Cuba a apoya e negociacion, tabata falta Washington pa duna luz berde na e esfuerso.
Barbados ta habri un fase nobo. Negociacion mas profundo por sigui cu por duna resultado riba e puntonan clave di e negociacion. Manera anuncia, ta trata di seis punto. Cada un ta exigi un labor ingenioso, y manera e norma imponi pa Noruega ta dicta, no por anuncia nada concreto te cu keda cla cu tur e seis puntonan, cu aprobacion 100% di ambos partido. E puntonan menciona pero no confirma, cu AlNavio a logra haya ta cinco, no seis:
– Eleccion cu un Conseho Nacional Electoral nobo;
– Disolucion di Asamblea Nacional Constituyente;
– Reincorporacion di Chavismo na Asamblea Nacional;
– Eleccion dentro di un aña, incluso menos;
– Eleccion cu o sin Nicolas Maduro como candidato.
Unda tin consenso, di ambos banda, ta cu e situacion di Venezuela ta urgente. Tin un discusion firme riba e tema di eleccion. No solamente eleccion presidencial, sino tambe pa Asamblea Nacional. Esaki ta un exigencia di e Chavistanan cu e hendenan di Guaido ta mira cu positivismo, pasobra den cierto sentido e ta un reconocimento di e Asamblea legitimo. Fecha di e eleccion ey ta depende di ki tempo ta seya e acuerdo. Mientras mas esaki tarda, mas eleccion lo tarda tambe. Semper lo mester di sigur un periodo di no menos cu ocho luna pa organisa tur cos.
E creacion di un Conseho Nacional Electoral cu ta garantisa neutralidad di eleccion ta un di e puntonan riba mesa, y ta parce cu ya tin un acuerdo riba esaki. Segun constitucion e organismo pa nombra CNE ta Asamblea Nacional cu tin un mayoria grandi opositor. Ta conoci cu tin tambe avance riba e punto di regreso di e Chavistanan na Asamblea Nacional pa normalisa funcionamento di e parlamento. Aunke cu recientemente Maduro lo a ordena e miembronan di su Asamblea Nacional Constituyente ilegitimo pa reanuda trabao, tambe ta conoci cu e diario Ultimas Noticias, pro-gobierno, a anuncia cu Maduro a ordena e recuperacion di e asientonan Chavista den Asamblea Nacional legitimo. Esaki ta ser mira mas como un resultado di e negociacion cu e ta parce un iniciativa di Maduro mes.
Den e proximo dianan lo ta clave pa haya sa si e regimen ta debolbe inmunidad parlamentario na e diputadonan persigui pa Tribunal Supremo di Husticia. E delegacion di Guaido tabata insistente al respecto. E realidad ta cu hasta e propio presidente interino a perde su inmunidad, y a keda cu e ‘inmunidad’ cu e proteccion Mericano ta duna. Ningun autoridad di e dictadura, uniforma of no, ta tribi di mishi cu Juan Guaido, un hecho unico den henter e conflicto aki.
E restauracion di e inmunidad parlamentario tambe tabata un di e recomendacionnan cu tabata den e informe tocante Venezuela elabora pa Michelle Bachelet, Alto Comisionado pa Derecho Humano di Nacionnan Uni.
Na Barbados e informe di Bachelet no tabata un fantasma. E tabata riba mesa. Aunke e propio Maduro ta bisa cu e ta falso – e documento ta mustra y ta detaya na mundo con su regimen ta persigui, reprimi y tortura oposicion – su negociadornan sa cu e contenido ta corecto, manera un fuente di canciyeria di Maduro a confirma na AlNavio.
Tocante e documento, e fuente a bisa cu por adelanta e resultadonan di e negociacion. Ademas el a recorda cu na horizonte tin un fecha clave: 17 di september. E dia ey ta cuminsa e Asamblea General di Nacionnan Uni na New York. Y si cos sigui manera e ta awor, si e regimen no ta avansa, nan ta sigui di ta e tema principal y cu mas exposicion negativo.
Manera e fuente a bisa, “Venezuela ta su so,” pa cual e mester mustra avance pa por continua. Mas ainda si ta bay den direccion di un eleccion.
Den conversacion, e punto mas polemico ta sigui e mesun. Ken lo goberna te cu yega na eleccion? Maduro? Guaido? Chavismo? Lo unico cu ta conoci ta loke un fuente liga na e negociacion a bisa AlNavio.
“E presion di paden y pafo di e pais ta intensifica, tur ta mira Maduro como e gran obstaculo pa normalisacion di Venezuela. Cualkier alternativa riba mesa tin di haci cu con ta kita e obstaculo ey.” Dentro di e ultimo presionnan, tin tambe e sancion cu Departamento di Tesoro di Estadonan Uni a impone riba yiu di Maduro, Nicolasito Maduro Guerra.
Mientras tanto, ta conoci cu Chavismo ta pensando riba e futuro eleccion. Nan ta baraha nan cartanan di e posible candidatonan. Manera presidente di e Asamblea Nacional Constituyente, Diosdado Cabello, y gobernador di estado Miranda, Hector Rodriguez, miembro tambe di e ekipo negociador di Maduro.
Hector Rodriguez ta un figura cerca di Maduro cu a gana bastante prestigio den ultimo dianan, y un informacion di e diario Spaño ABC ta bisa cu Cabello lo a duna su aprobacion pa Rodriguez ta e candidato.
