Tin indicacion cu gruponan delincuente relaciona cu narcotrafico a logra infiltra den forsanan di siguridad Venezolano, segun e advertencia den un informe di e organismo di Nacionnan Uni, cu ta vigila cumplimento cu e tratadonan internacional contra droga.
Ta menciona explicitamente e red conoci como ‘Cartel de los Soles’ cu ta facilita entrada y salida di droga ilegal den e informe di e Hunta Internacional di Control di Narcotica (na Ingles: International Narcotics Control Board, INCB), den su informe anual difundi ayera na Viena, Austria.
E organismo independiente, integra den sistema di ONU, ta haci e mencion señalando den su informe di 2019 cu gruponan delincuente organisa “ a transporta gran cantidad di droga ilicito pa Europa y Estadonan Uni for di Colombia, pasando via Venezuela”.
Segun INCB, pa controla e trafico ey, specialmente esun di cocaina a traves di Centroamerica pa Estadonan Uni, “e gruponan delincuente organisa ta controla e puertonan maritimo y ta usa avion liviano, cu cual nan ta realisa vuelo ilegal.”
INCB ta un “un organo independiente ” constitui pa diestres experto cu un mandato di cinco aña y cu tin como funcion verifica cumplimento di e convencionnan internacional encuanto droga.
Presidente di INCB, e Hulandes Cornelis P. de Joncheere, a splica Efe cu, e mencion ey ta pa mustra “preocupacion” y yama atencion di gobierno di Venezuela pa un potencial problema.
“Tampoco e ta un cos asina straño, si tur gobierno tabatin cien porciento control riba nan teritorio anto nos lo no tin un problema mundial di droga,” e experto Hulandes a afirma.
“Esey tambe por sucede na Venezuela y p’esey nos a skirbi e nota aki, e ta un indicacion di e preocupacion di e hunta den e sentido ey,” agregando cu e hunta ta mantene comunicacion cu gobierno Venezolano den e asunto aki.
