E pandemia di coronavirus a genera un ola di xenofobia cu ta afecta e migrantenan cu a bandona na pais pa Chavismo, mas ainda contra esnan cu tin menos recurso y no por paga huur pasobra nan a keda sin entrada di nan trabao informal.
A keda den olvido e temponan cu Venezuela a ricibi miyones di migrante, pa e guera interno di Colombia cu a trece miyones di refugiado Colombiano pa Venezuela, o di e Peruanonan den decada di 80 cu a confronta un tremendo inflacion y e etapa di terorismo di Sendero Luminoso y Movimento Tupac Amaru. E actual crisis causa pa e Revolucion Bolivariano a obliga miyones di Venezolano pa migra pa diferente pais, pero e parti mas vulnerable ta e poblacion mas pober, cu ta biba di dia pa dia, cu a bay otro pais, hasta canando.
Awor e pandemia mundial di Covid-19 a haci e Venezolanonan ey mas indefenso ainda. Den cayanan y den transporte publico di Colombia, Ecuador, Peru y otronan, por observa nan bendiendo caramel te pidiendo limosna. Otronan den bodega, almacen o fabrica, e gran mayoria mal paga y cumpliendo orario di 12 pa 14 ora diario, cu nan tin profesion of no. Asina mes, cu e minimo ey nan tabata manda algun dollar pa nan famia na Venezuela, ademas di por cumpra cuminda y huur un lugar di biba, aunke riba otro y den condicion insalubre. Varios delincuente Venezolano a haci mas dificil ainda pa logra aceptacion den e otro paisnan aki. Un parti di esnan cu no por mantene nan mes den pais aheno, a cuminsa e ruta dificil di regreso, principalmente via frontera cu Colombia. Nan ta bin topa atrobe loke nan a laga atras.
