Conseho di Siguridad di Organisacion di Nacionnan Uni (ONU) a reuni ayera pa discuti e crisis grave na Venezuela, riba solicitud di Estadonan Uni y a conta cu presencia di vice-presidente Mericano Mike Pence, ken a solicita, hunto cu otro estadonan miembro, na e Conseho pa atende e asunto.
Mark Lowcock, secretario general adhunto di Asunto Humanitario di ONU, a duna inicio na e sesion splicando cu e obhetivo ta tocante e asistencia humanitario prioritario pa Venezuela. El a afirma cu e pais tin un autentico crisis humanitario, cu a bira mas grave ainda a raiz di e blackoutnan reciente cu a afecta henter e teritorio nacional.
Lowcock a splica cu 7 miyon persona na Venezuela mester cu urgencia asistencia humanitario, loke ta representa casi 25 % di poblacion actual na e pais.
Vice-presidente Mericano Mike Pence a pidi den Conseho di Siguridad pa reconoce Juan Guaido como presidente encarga di Venezuela, considerando cu Nicolas Maduro ta usurpando poder despues di proclama su mes presidente, despues di gana eleccion cu ta carece di legitimidad.
Vasili Nebenzia, representante di Rusia, a sigui e discurso di regimen Chavista y a rechasa e “injerencia” di Merca na Venezuela. El a menciona cu e crisis di Venezuela por keda resolvi solamente a traves di un dialogo nacional, sin embargo e ta bisa cu Juan Guaido no kier esey, ya a tild’e di ta titere di Estadonan Uni.
Mayoria di e paisnan miembro tabata na fabor di efectua ayudo humanitario, bao condicion di imparcialidad, na e pais. Conseho di Siguridad no a yega na aprobacion di propuesta haci ainda.
Na Venezuela mes, miles di Venezolano a subi caya pa apoya presidente interino Juan Guaido den su exigencianan pa terminacion di e usurpacion di Maduro, gobierno di transicion y eleccion liber.
