Gana tempo y luci fuerte…
Esunnan cu tabatin e speransa cu lo a bin un delegacion di Venezuela, cu poder pa yega na un acuerdo di biaha, a sali mal ekiboca. Despues di seis ora di discusion, nan mester bay studia e caso prome… Dios sa ki dia nan ta bolbe pa caba di negocia e asunto aki. Esey ta e impresion cu nos tin actualmente, y nos ta spera cu nos no tin rason. E pregunta ta, pakico nos tin e impresion aki. E contesta ta simpel: den e fase aki di e situacion interno di Venezuela, no tin nada mas valioso cu tempo.
Nos ta mira esaki den e proceso di dialogo cu ta tuma luga na Republica Dominicana entre gobierno y oposicion, unda atrobe a pospone e negociacionnan te mas den e siman aki. Y no kere cu lo tin un acuerdo tampoco por lo pronto, pa un motibo masha cla: un acuerdo na e momento aki lo significa di banda di gobierno di Maduro un gesto di comparti poder. Por ehemplo si nan a bay acuerdo cu e exigencia di oposicion di comparti e puestonan cu tin den e Conseho Nacional Electoral, e organismo cu mester supervisa eleccion, y principalmente eleccion e aña aki pa un presidente. Nan por concede algun puesto den e conseho, pero semper e lo ta un parti minoritario, mientras nan ta sigui controla e conseho, y tambe henter e resto di e structura di poder, militar, policial, gubernamental, loke ta duna nan amplio oportunidad pa manipula eleccion.
Y si acaso nan concede e conseho completo mes y pone esaki bao di escrutinio internacional, y hasta si e actual oposicion logra un victoria den eleccion, e poder ta keda den man di esunnan cu tin e armanan: polis y militar, cu sa masha bon cu ta nan hefenan, hunto cu e politiconan corupto di e partido Chavista, a organisa e tragedia, a traves di e robo sin precedente cu a tuma luga ey. Si acaso bin un otro gobierno na mando, ta indispensabel pasa pa persigui henter e top militar y policial. Loke nan por haci, ta bandona e pais y purba probecha di e miyones horta na otro pais cu kier duna nan proteccion y luga di biba. E unico luga sigur cu tin ta Cuba, pasobra otro pais manera Bolivia, Nicaragua o Ecuador, ta demasiado habri, dunando oportunidad pa vengansa logra yega na nan. Pregunta lo ta si e regimen Cubano lo ta asina encanta cu ricibi nan y duna nan un monton di privilegio cu nan mes hendenan no tin.
Esaki ta haci cu e hendenan aki lo purba mantene poder intacto te na ultimo, sabiendo cu pa nan no tin mañan. Esaki ta e diferencia tambe cu e situacion por ehemplo na Nicaragua na 1990, unda e Sandinistanan a tene eleccion y entrega poder ora nan a perde, den condicionnan economico hopi mas faborable cu loke ta e caso awe na Venezuela. E deterioro economico na Venezuela a bay asina leu cu ningun hende por para esaki. Solamente un cambio drastico den gobierno, cu ayudo y inversion grandi, y pa tempo largo, por logra trece e pais na unda e tabata prome cu e aventura socialista aki a cuminsa.
Awor, kico ta e relacion cu e situacion di conflicto cu e islanan? Gobierno Venezolano no tin ningun interes pa e ‘problema’ cu nan a crea, ta resolvi dentro di poco. No ta un asunto cu e islanan so, sino cu Hulanda y Union Europeo tambe. Y mas ainda pasobra nan ta sinti cu e asunto aki por bira un ‘triunfo’ pa nan, cu por yuda kita atencion di e problemanan na nan mes pais. Pues Aruba mester prepara pa busca alternativa pa loke ta e comercio existente cu Venezuela, por lo menos esun cu tabatin te algun dia pasa, y no bay yega na acuerdo, cu e regimen delincuente aki por uza pa gaña wowo di hende na nan pais. Tambe pasobra, manera nos a argumenta algun biaha caba, e ‘problema’ cu e islanan ta totalmente insignificante si nos compara esaki cu e fluho enorme di hende y mercancia cu a bay te awor, y ta sigui bay den direccion di e bisiña riba tera firme, Colombia. A caba di anuncia e cifra di 470.000 persona di Venezuela, cu den e ultimo añanan a busca refugio na Colombia. Historia ta ripiti, tambe, pasobra den e añanan di violencia politico y criminal grandi, mas di un miyon y mey di Colombiano a busca refugio na Venezuela…
E dianan aki ta un bon momento pa nos reflexiona ken nos ta realmente. Nos ta un par di isla miedoso di enfrenta e bisiña bully grandi, cu kier bisa nos kico pa haci? No, den e mundo grandi aki nos ta parti di Reino Hulandes y ta cay bou proteccion di Hulanda. Y tambe por conta riba apoyo di NATO y Estadonan Uni. Den e situacion actual naturalmente e hendenan aki ta formalmente gobierno di e pais, pero no pa mucho tempo mas y nos mester por deal cu e gobierno cu ta sigui tambe. Poder ta garnando na pida actualmente y gobierno no tin grip riba miyones di hende cu hamber. No hay mal que dure cien años.
