(AP) — Gobierno Mericano a reconoce candidato di oposicion Venezolano, Edmundo Gonzalez como e “presidente electo” di e pais Sur Americano diamars, lunanan despues cu presidente Nicolas Maduro a declara victoria den eleccion na juli.
Secretario di Estado Mericano, Antony Blinken a reconoce Gonzalez den un post riba X den cual tambe el a exigi “respet pa boluntad” di votadornan Venezolano.
Administracion di presidente Mericano, Joe Biden anteriormente a bisa cu Gonzalez a ricibi mayoria di voto den eleccion disputa dia 28 di juli, pero no a reconoc’e como presidente electo.
Conseho Nacional Electoral, cu ta yen di hende leal na Maduro, a declara Maduro como ganador di eleccion algun ora despues cu e urnanan a cera.
“Nos ta aprecia e reconocemento di soberania di tur Venezolano,” Gonzalez a bisa den un post riba X tiki despues di declaracion di Blinken diamars. “E gesto aki ta honra e deseo di nos pueblo pa cambio y e logro civico cu nos a ehecuta hunto dia 28 di juli.”
Gonzalez a bandona Venezuela na september pa exilio na Spaña despues cu un orden a keda emiti pa su aresto en conexion cu un investigacion riba publicacion di e actanan di votacion.
Minister di Exterior Venezolano, Yvan Gil a responde na comentarionan di Blinken cu atake personal. “Den ultimo dianan di su gobierno, e lo mester dedica su mes na refleha riba su fayonan, deshaci di complehonan imperial y colonial, y bay skirbi e memoir di con e Revolucion Bolivariano a pon’e come e stof di derota, igual cu su predecesornan,” Gil a bisa di Blinken den un declaracion, cu no a menciona resultado di eleccion.
Maduro y autoridadnan electoral a rechasa yamadonan ripiti di Merca, Union Europeo, Colombia, Brazil y otro nacionnan pa mustra e registronan detaya di voto cu ta sostene reeleccion di e presidente. Critica pa falta di transparencia despues di eleccion a pone Maduro pidi Tribunal Supremo di Husticia Venezolano, kende su miembronan ta alia cu e partido den gobierno, haci un auditoria di e resultadonan. E corte supremo a reafirma su victoria.
