(ElNacional/Bloomberg) – Estadonan Uni lo a recomenda oposicion Venezolano, cu ta dirigi e empresa Citgo, pa negocia cu acreedornan pa evita liquidacion di e empresa. Esaki despues cu na october un huez na Merca a aproba e proceso di licitacion pa e venta publico di PDV Holding, e empresa matriz di Citgo, cu e meta pa haya e placa pa paga e mas di 1.000 miyon dollar cu debe Crystallex, e empresa Canades cu a keda perhudica cu nacionalizacion di su propiedadnan na Venezuela, sin compensacion.
Pa e momento aki e benta no por continua pasobra Citgo ta haya proteccion di gobierno Mericano, pero e huez den e caso a fiha un plazo di seis luna pa e proceso. Un negociacion por pone un fin na e liquidacion menazante di e compania.
Embahador di Merca designa na Venezuela, James Story, a sugeri na miembronan di oposicion Venezolano, cu ken el a reuni luna pasa na Panama, pa usa cashflow di e compania pa yuda paga e debe. Asina cinco fuente lo a revela na Bloomberg, cu no tabata autoriza pa papia publicamente di e asunto.
Horacio Medina, hefe di e hunta directivo ad hoc di Pdvsa, designa pa oposicion, a bisa cu e empresa ta habri pa explora opcion cu acreedor, pero a nenga di duna detaye encuanto eventual negociacion. Sin embargo, a bira conoci cu a contrata JPMorgan Chase & Co. como asesor. Un abogado cu ta representa Crystallex den e caso contra PDV Holding a bisa cu e empresa ta dispuesto pa papia.
Sin embargo, no ta trata solamente di Crystallex, cu mester di un benta parcial di e accionnan di Citgo pa haya nan placa. Entre otro tambe e empresa petrolero ConocoPhillips kier cobra via un benta di Citgo. ConocoPhillips a gana un demanda na 2013 contra gobierno di Chavez. Tambe tin varios tenedor di bono cu no a haya pago, cu ta buscando pago via benta publico di Citgo.
