(ElNacional) – Merca a ratifica dialuna cu e sancionnan imponi desde 2019 contra gobierno di Nicolas Maduro lo keda vigente te ora cu tin progreso den e cumplimento di e aspiracionnan democratico di pueblo Venezolano.
“E sancionnan contra regimen di Maduro ta sigui vigente”, vocero di Departamento di Estado Mericano, Ned Price, a bisa durante un rueda di prensa.
Washington a expresa ariba diferente ocasion su boluntad pa revisa e sancionnan economico contra Venezuela, si nan observa un avance den e negociacionnan entre gobierno di Maduro y representantenan di oposicion.
“E regimen di Maduro, di otro banda, no a negocia di bon fe ni a cumpli cu e compromisonan ey”, Price a denuncia.
Pa e motibo ey e funcionario a afirma cu e sancionnan lo permanece na luga te ora cu tin un progreso remarcabel den e cumplimento di e aspiracionnan democratico di pueblo Venezolano.
El a agrega: “Si regimen di Maduro no ta cumpli cu su promesa di negocia di bon fe, nos tin e potencial tambe di calibra e sancionnan ey den otro direccion.”
Maduro kier a influencia e dialogonan cu oposicion, prome, pa Cas Blanco (White House) suspende e sancionnan, despues pa e liberacion di su colaborador cercano, e Colombiano Alex Saab y recientemente, pa e liberacion di e Venezolanonan deteni na Buenos Aires.
Price tambe a adverti e ciudadanonan Mericano pa no biaha pa Venezuela. Na fin di luna di juli e Departamento di Estado a marca e pais como destino cu indicador D, un señal di alerta cu nan por wordo deteni inhustamente.
“Mas cautela na Venezuela debi na terorismo y detencionnan inhusto”, e comunicado a señala cu e ultimo actualisacion di alerta na biaheronan.
