Estadonan Uni a revela diasabra cu ta trahando cu otro pais pa crea un fondo di 10.000 miyon dollar, cu meta di yuda e proximo gobierno di Venezuela pa reconstrui nan capacidad di haci comercio cu resto di mundo.
Secretario di Tesoro Mericano, Steven Mnuchin, a haci e anuncio na un grupo chikito di periodista, despues di conclui su participacion na e reunion di primavera di Fondo Monetario Internacional y Banco Mundial, segun The Wall Street Journal.
“Nos ta bay traha pa purba forma un consorcio di aproximadamente 10 biyon dollar n financiamento, cu lo ta disponible na e gobierno nobo, pa asina facilita comercio,” Mnuchin a bisa.
E mandatario di Tesoro no a precisa cual otro paisnan tin planea pa contribui na e medida aki, pero e siman aki Merca a participa na un reunion tocante con pa apoya recuperacion economico na Venezuela hunto cu ministronan di Finanzas di Argentina, Brasil, Francia, Alemania, Japon, Reino Uni y otronan, segun Wall Street Journal.
Mnuchin tambe a sigura cu a cuminsa conversacion cu IMF y Banco Mundial tocante posibilidad di proporciona apoyo financiero na Venezuela. Sin embargo, reglanan di e Fondo ta impedi e organismo ofrece e asistencia aki na e lider opositor Juan Guaido, mientras no tin consenso entre su miembronantocante si ta reconoce Guaido.
Mas di 50 pais ta reconoce Guaido como presidente interino di Venezuela, pero algun manera Rusia y China ta keda sostene Maduro.
Christine Lagarde, director general di IMF, a bisa den rueda di prensa diabierna cu decision di e miembronan mester ta cu un amplio mayoria pa reconoce autoridadnan como legitimo.
Algun analista consulta pa e agencia di noticia ta calcula cu e posible pakete di rescate di IMF y otro institucion pa stabilisa economia Venezolano na por lo menos 60 biyon dollar.
