Venezuela: Merca ta pone fecha limite pa transaccion cu Pdvsa

Entidadnan no Mericano cu ta cumpra crudo y producto deriva di e compania petrolero estatal Venezolano Pdvsa den transaccion cu ta involucra e sistema financiero, coredor(electronico) o persona di Merca, mester tin esakinan likida prome cu 28 di april proximo, segun departamento di Tesoro en un aviso publica ayera.

E aviso ta aclara parti di e confusion cu a rondona e sancionnan imponi pa Estadonan Uni riba Venezuela na inicio di siman.

Ademas di Estadonan Uni, Venezuela ta bende su petroleo na cumprado na henter mundo, incluyendo India y Europa, y e pais Sur Americano tabata buscando cumprado na otro luga pa reemplasa e aproximadamente 500.000 bari pa dia cu ta bende cu Merca.

Desde e momento cu a impone e sancionnan, industria petrolero global a trata di resolve e sancionnan, cu ta congela e activonan di Pdvsa y ta obliga e empresanan Mericano pa paga e petroleo a traves di cuenta controla pa e lider opositor y reconoci pa Washington como e presidente interino di Venezuela, Juan Guaidó.

Incluso prome cu e notificacion di ayera, e cumpradonan Europeo a retira e envionan desde Venezuela debi na e preocupacionnan di con realisa e pagonan.

E aviso di ayera a determina cu e entidadnan no Mericano cu ta involucra coredor o e sistema financiero Mericano mester likida e transaccionnan ey pa fin di april. Gran parti di e mercado petrolero mundial ta trafica na dollar y, por lo tanto, lo ta suheto na e supervision di Merca.

E gobiernonan Europeo tambe ta considerando sancion, cu igualmente lo corta e capacidad di Venezuela pa haci negoshi den euro.

Adicionalmente, e Mericanonan cu ta trahando den empresa no Mericano pafo di Merca y Venezuela tin te cu 29 di maart pa realisa “cierto transaccion di mantenemento o likidacion”, segun e aviso di fecha 31 di januari cu a keda publica riba website di e departamento.

E aviso ta ofrece mas detaye encuanto e transaccionnan cu ta permiti y prohibi, y ta duna indicacion encuanto e derechonan di e tenedonan di bono relaciona cu e compania Mericano Citgo Petroleum Corporation, como tambe detaye di kico ta considera transaccion di “mantenimento.”