Departamento di Husticia di Merca a anuncia e interupcion exitoso di un envio di combustible multimiyonario di Guardia Revolucionario Islamico (IRGC), un organisacion terorista stranhero, y cu tabata caminda pa Venezuela. E accionnan aki ta representa e confiscacion mas grandi di cargamento di combustible di Iran di parti di gobierno Mericano.
Dia 2 di juli 2020 Merca a presenta un keho den cual nan tabata trata di confisca henter e cargamento di producto petrolero a bordo di cuatro tanker di bandera stranhero, incluyendo M/T Bella, M/T Bering, M/T Pandi y M/T Luna. Huez di Corte di Distrito di Merca Jeb Boasberg pa Distrito di Columbia a emiti un orden di incautacion di e carga di e cuatro barconan.
Gobierno awor a anuncia cu a ehecuta e orden hudicial cu exito y a confisca e cargamento di e cuatro barconan, pa un total di aproximadamente 1,116 miyon bari di petroleo. Cu ayudo di socionan stranhero, e propiedad confisca ta awor bao custodia di Merca.
Despues di ehecucion di e orden, marina di Iran a aborda cu forza un barco no relaciona cu e asunto den un intento di recupera e petroleo confisca pero nan no tabatin exito. Comando Central di Merca a publica un video di e operacion cu a faya.
E fondonan confisca cu exito di un patrocinador estatal di terorismo por bay total o parcialmente na un Fondo pa victima di terorismo patrocina pa Merca, despues di cera e caso.
E intercepcion di e cargamentonan ta haci e problema di escasez di gasolin na Venezuela mas urgente ainda, mientras e regimen ta trata te awor sin exito di restart su refinerianan.
