E negociacion na Noruega entre e delegacion di Nicolas Maduro y di Juan Guaido mester enfoca exclusivamente riba salida di Chavismo di poder, esey ta e punto di bista di gobierno Mericano, segun vocero di Departamento di Estado, Morgan Ortagus.
“Nos ta tuma nota di e combersacionnan na Noruega. Manera nos a bisa repetidamente, Estadonan Uni ta kere cu lo unico cu por negocia cu Nicolas Maduro ta e condicionnan pa su salida,” segun Ortagus a bisa periodistanan.
“Mirando cu esfuersonan anterior pa negocia a fracasa pasobra e regimen a uza nan pa dividi oposicion y pa gana tempo, nos ta spera cu e combersacionnan na Oslo keda centra riba salida di Maduro como precondicion pa por avansa,” Ortagus a añadi.
Gobierno di presidente Trump a descarta na varios ocasion dialoga cu e mandatario Venezolano, cu nan ta considera un “dictador”.
Pero Noruega a logra haya na mesa e representantenan di e regimen di Maduro y di Juan Guaido, reconoci como presidente interino di Venezuela pa Estadonan Uni y mas di cincuenta otro pais.
E reunionnan na Oslo a cuminsa dialuna pasa y a extende te oranan di anochi, y lo mester termina awe, diaranson, un fecha cu por cambia, asina varios fuente cerca di e proceso a señala na AFP. Representantenan di ambos banda a reuni ya separadamente cu mediadornan Noruego algun siman atras, pero no tabatin ningun contacto directo.
