Rusia tin mas di 100 militar na Venezuela y e presencia ey ta añadi na e tensionnan na e pais, pero Estadonan Uni y su aliadonan no tin plan inmediato pa manda militar pa libera e Venezolanonan di e regimen di Nicolas Maduro, asina Elliott Abrams, enviado special di presidente Trump pa asuntonan Venezolano, a bisa diahuebs pasa.
E crisis Venezolano, sin embargo, ta generando cada bes mas alarma alrededor di mundo y organisacionnan di derecho humano a exhorta Organisacion di Nacionnan Uni (ONU) pa declara un “crisis humanitario compleho”na e pais. Di su parti Washington a solicita un reunion nobo di Conseho di Siguridad pa trata e tema.
E presencia di personal militar Ruso na Venezuela, situacion cu a aumenta e tension entre Washington y Moscu, a continua riba tapete. Abrams a trata e asunto den un entrevista cu e emisora radial Colombiano Caracol.
Mientras cu e repudio ta creciendo pa e presencia militar di Rusia na Venezuela, di e capital Ruso ta bin declaracion cu ta confirma cu e militarnan no t’ey pa apoya e Chavistanan so, sino tambe pa “preveni actonan insensato manera un intervencion militar,” palabranan di vice prome ministro Yuri Borisov comentando e apoyo Ruso na e dictadura Venezolano.
Pero Estadonan Uni, y e resto di e mas di 50 paisnan cu ta reconoce Juan Guaido como e legitimo presidente interino di Venezuela, te na e momento aki no tin entre nan cartanan plan pa manda militar pa libera e pais di un regimen financia pa narcotrafico y cu asesoria di Habana y Moscu, segun Abrams.
“E situacion ta empeorando na Venezuela cada dia, pero mi no ta kere cu na Europa, America Latino, Canada o Estadonan Uni nos ta pensando na e momento akiriba un reaccion militar,” Abrams a expresa. Esey no kier bisa cu e opcion militar a keda descarta, segun Abrams, insistiendo cu tur opcion ta riba mesa ainda.
