E hefe di diplomacia di Estadonan Uni, Mike Pompeo, a acusa ayera Rusia di ta haciendo e tensionnan na Venezuela cu su presencia militar pa apoya e regimen di Nicolas Maduro y a adverti cu Washington no lo keda “cu brasa crusa.”
“Estadonan Uni y e paisnan regional no lo keda cu brasa crusa mientras Rusia ta exacerba e tensionnan na Venezuela,” Pompeo a bisa su homologo Ruso, Serguei Lavrov, durante un yamada telefonico ayera dialuna, e portavoz adhunto di Departamento di Estado, Robert Palladino, a bisa.
“E entrada continuo di personal militar Ruso pa apoya e regimen ilegitimo di Nicolas Maduro na Venezuela ta core e riesgo di prolonga e sufrimento di pueblo Venezolano cu ta apoya abrumadoramente e presidente interino Juan Guaido,” el a bisa den un comunicado.
Pompeo a haci un yamado na Rusia pa “para su comportamento no constructivo” y pa uni su mes na e paisnan cu ta busca un miho futuro pa pueblo Venezolano.”
E agencia estatal Ruso Sputnik a confirma diadoming pasa cu dos avion di Forsa Arma Ruso a baha diasabra pasa na aeropuerto internacional di Maiquetia, transportando personal militar y material.
Rusia, hunto cu China ta un di e principal acreedornan di e debe multimiyonario di Venezuela, a opone sistematicamente e campaña di Washington pa sanciona Maduro.
E colaboracion militar entre Caracas y Moscu a fortalece den ultimo dos decada cu yegada na poder di Hugo Chavez, cu e compra di material y armamento militar.
Rusia ya a demostra su apoyo a Maduro mandando dos bombardero Tu-160 pa Venezuela na december pasa pa participa den un ehercicio militar.
E presidente Ruso, Vladimir Putin, a ordena den pasado su forsanan militar, o paramilitar pa drenta den escenarionan conflictivo pa desafia strategianan di Estadonan Uni, specialmente na Siria y Ucrania.
