Estadonan Uni a bisa algun empresa grandi den comercio di combustibel pa aviacion pa nan suspende e comercio di combustibel pa avion cu Venezuela o enfrenta sancion di banda Mericano,aumentando asina e presion riba presidente Nicolas Maduro pa e bandona poder, segun dos fuente di e sector comercial aki.
Segun e fuentenan conocedo di e sector varios compania importante cu sede na Gran Bretaña y Suiza a haya yamada e siman aki di parti di funcionarionan di Departamento di Estado Mericano, unda Washington ta trata di restringi vuelo comercial y militar na Venezuela.
E funcionarionan a bisa cu e comercio di diesel cu Venezuela ainda ta considera legal pa Estadonan Uni, pa motibonan humanitario. Departamento di Estado no a responde di inmediato riba peticion pa comentario di Reuters.
E trafico aereo na Venezuela a disminui gradualmente den ultimo añanan, te cu e punto cu casi no tin aerolinea internacional stranhero ta bula riba Caracas, esaki principalmente pa e hecho cu e aerolineanan tabatin problema pa haya nan benta den divisa convertible di e pais, y no den moneda local cu tabata sufri severamente di inflacion. Recientemente Estadonan Uni a añadi un prohibicion pa tur vuelo cu cualkier compania entre Venezuela y teritorio Mericano.
