(ElNacional) – Gobierno di Joe Biden a libera diaranson ultimo e empresario Colombiano Alex Saab, den un intercambio pa ciudadanonan Mericano cu tabata deteni na Venezuela, varios di nan acusa di participa den supuesto plannan pa atenta contra Nicolas Maduro. E informacion ainda no ta completo y no ta conoci e detayenan di e negociacion.
Apenas algun dia pasa su casa, Camilla Fabri, a aparece den un video den cual el a mustra imagennan nunca bisto di Alex Saab cu su yiunan mas chikito. “E ta e motor di e famia. Ta un bon tata ta e don mas grandi cu e tin. E recuerdonan ta haci dolor. Nos kier pa e bin back cas. Pa nos, manera famia, tempo a stop,” e muhe a bisa, cu ta bisa tambe cu e ta actividad na e pais pa derechonan humano.
Kisas e tabata un señal di loke lo pasa poco despues. E informacion di e liberacion di e empresario Colombiano, ken tabata wordo procesa pa labamento di placa, a wordo confirma na e agencia di noticia The Associated Press, despues di varios ora di speculacion. Aunke ainda no ta cla si Nicolas Maduro lo laga bay den e intercambio algun di e Mericanonan cu ta deteni na Venezuela of tur di nan. Pasobra Alex Saab no tabata cualkier preso. E ta un piesa clave den e regimen socialista.
Segun e chavismo, Alex Saab ta un supuesto agente antiblokeo, pero pa periodistanan di investigacion, cu pa añas a sigui su pasonan, e no ta mas cu un empresario corupto cu, entre e sombranan, a cera contractnan cu e Estado y cu a saca probecho di e sufrimento di e Venezolanonan durante e epoca di mas hamber y necesidad. Entre e negoshinan scur, ta menciona e benta di cuminda di mal calidad cu e asina yama Comites Locales de Abastecimiento y Produccion tabata distribui.
Den un entrevista recien, e periodista Venezolano Roberto Deniz, ken a sali di e pais cu su ekipo di Armando.info pa e menasanan den su contra despues di revela e negoshinan poco transparente di Alex Saab, a bisa diamars 19 di december cu te cu mil miyon di dollar a pasa den e mannan di e diplomatico.
Dia 16 di october di 2021 Alex Saab a wordo extradita pa Merca despues di un proceso legal na Cabo Verde, unda el a wordo deteni dia 12 di juni ora cu su avion a haci un aterisahe pa yena gasolin. E polis a detene e empresario riba peticion di un solicitud di Merca dirigi pa e Polis Internacional.
Henter e proceso na Cabo Verde tabata dilata pa e chavismo cu apelacionnan pa cada decision di e husticia di Cabo Verde. Desde su captura, e regimen socialista a sigura cu e Colombiano tabata gosa di un supuesto inmunidad diplomatico y cu hamas nan mester a detene, door di cual nan tabata afirma cu e proceso tabata inconstitucional.
Den e ultimo tres añanan e chaviso a mantene un campaña amplio den un intento pa limpia e imagen di Alex Saab y exigi su liberacion.
Aworaki, cu e chavismo a logra su obhetivo, e liberacion di Alex Saab no a sucede pasobra e husticia Mericano a haya cu e ta incoente di e cargonan pa labamento di placa, si no pasobra e gobierno di Joe Biden tin interes den regresa e ciudadanonan Mericano cu tabata deteni manera rehen na Venezuela, y mas ainda ora cu e aña electoral ta cerca den cual posiblemente e ta bay busca e reeleccion.
