Departamento di Tesoro Mericano a emiti diamars un licencia cu ta duna un excencion di e sancionnan imponi na Venezuela pa algun transaccionnan necesario pa e operacionnan ordinario di waf y aeropuerto.
E anuncio di Tesoro ta destaca e alcance di e sancionnan imponi riba Venezuela na 2018 y 2019 pa autorisa empresanan bao hurisdiccion Mericano ‘operacionnan ordinario y necesario pa e uso di waf y aeropuerto na Venezuela’.
Igualmente, Oficina di Control di Activodnan Stranhero di Tesoro (OFAC) a autorisa e Instituto Nacional di Espacionan Acuatico (INEA) pa realisa operacionnan cu e mesun obhetivo di permiti funcionamento portuario.
OFAC ta aclaria cu e licencia aki no ta libera di sancionnan ningun di e funcionarionan Venezolano suheto na esakinan y no ta permiti actividad di importacion y exportacion.
Gobierno Mericano durante e presidencia di Donald Trump a impone sancionnan nobo riba e regimen di Nicolas Maduro pa violacion di derechonan humano y atentado contra democracia.
Merca na 2020 a inclui riba su lista preto di sancionnan e aerolinea estatal Venezolano, Conviasa, mientras cu hopi aerolinea internacional a stop di opera na Venezuela pa motibo di instabilidad y problemanan economico.
