A raiz di e candela den tres tanki di almacena diluente na e upgrader Petro San Felix, e dirigente sindical petrolero Ivan Freites a denuncia cu constantemente e trahadonan ta haya menasa di parti di gobierno di Nicolas Maduro, pa nan no pasa informacion tocante e deterioro di e instalacionnan.
Freites a indica cu accidente den instalacion di Pdvsa ta di tur dia. E empleadonan di Petro San Felix a inform’e cu e candela tabata di gran magnitud y a plama rapidamente. Dos tanki di 100.000 bari y otro di 180.000 bari di diluente, uza pa reduci e viscosidad di e crudo pisa di Zuata, estado Anzoategui, a bay perdi.
Freites a sigura cu e deterioro tabata e motibo pa cual e tres tankinan a kima. “E menasanan ta constante. 50 trahado a haya pension di manera obligatorio pa motibo politico. Y un compañero cu ta traha na e Faha di Orinoco ta preso pa manifesta su simpatia pa e presidente encarga, Juan Guaido,” asina Freites a declara.
E dirigente di e Federacion Unico di Trahado Petrolero tambe a informa cu na e waf di e Compleho Refinador Paraguana, na estado Falcon, tin un barco atraca cu petroleo destina pa Cuba. “Tin menasa di prizon pa traicion di patria pa e empleadonan di refineria cu ta nenga di carga e barco pa Cuba,” el a conta.
E sindicalista a afirma cu diariamente ta transporta 100.000 bari, aunke e experto petrolero Jose Toro Hardy a indica cu e cifra ey a baha considerablemente. Presidente encarga, Juan Guaido, den su decreto di Estado di Alarma a solicita otro pais pa para e barconan cu ta hiba petroleo pa Cuba.
