(LaPatilla) – Tin duda grandi entre mediconan na Venezuela pa loke ta e status cientifico di e vacuna Abdala, di produccion Cubano. Presidente di e Federacion Medico Venezolano (FMV), Douglas Leon Natera, a alerta e poblacion pa no laga pone e vacuna Abdala, considerando esaki un experimento biologico no autoriza.
“Poco ta conoci di e supuesto vacuna Cubano Abdala, pa cual ta recomenda e poblacion pa nolaga inyecta e producto ey,“ el a bisa.
E declaracionnan di e dirigente gremial ta un respuesta na declaracion di vice-presidente Chavista Delcy Rodriguez, ken dia 24 di juni a informa tocante yegada na Venezuela di un promer lote di vacuna Abdala. E mandatario Chavista a omiti di duna cifra tocante e cargamento y a insisti cu e vacuna ey tin un eficacia contra Covid-19 di 92%.
“Abdala no ta un vacuna. E ta un producto biologico experimental, cu no ta autoriza pa Centro di Control di Medicamento Cubano, ni pa Organizacion Panamericano di Salud,“ e medico a declara.
“E ciudadanonan Venezolano no ta “Conejillos de India” y Federacion Medico ta alerta e poblacion pa no laga nan inyecta tal supuesto vacuna, cu no ta ningun vacuna.”
El a splica cu e tema di vacuna ta ser trata entre cientifico di forma habri pa specialista den virologia, epidemiologia, infectologia y sanitarista, entre otro profesional.
“Salud no por ta obheto di politica partidista ni di accion scur manera gobierno na Miraflores ta pretende di haci,“ el a agrega. Tambe el a comenta cu e asunto ta nada mas cu otro negoshi di gobierno Venezolano hunto cu e regimen Cubano y cu den mantene control politico nada ta importa Maduro hunga cu bida di Venezolano.” Tema di salud pa Natera ta un ‘black box’ dirigi desde Miraflores, segun e presidente di FMV.
