Hopi docente a dicidi di drenta den otro actividad pa haya mas entrada y otronan a subi e lista di esnan cu a bay busca miho oportunidad den exterior.
E mayornan Venezolano a haya nan cu e obligacion di asumi e responsabilidadnan di e puestonan bashi cu e maestronan a laga na e scolnan.
E condicionnan critico den cual educacion ta den e pais tabata determinante. E situacion ta refleha con e institucionnan educativo a bay atras, pa loke ta e edificionan y tambe personal.
Un trabao publica pa Voice of America ta mustra e caso di Gabriela Carmona, un mama cu, sin titulo formal, a encarga su mes cu duna les. Carmona ta educa mucha den ‘sexto grado’ di un scol situa den un zona pober di Caracas.
“E docentenan ta bayendo di Venezuela y e scolnan ta kedando bashi. Nos como mama ta asumi e papel ey pasobra nos ta preocupa pa nos yiunan,” el a manifesta.
Nelida Riverol, otro mama cu a asumi e rol di maestra, a cuminsa duna les ocasionalmente, pero awor ta cubri totalmente e puesto vacante di un maestra di prome klas.
“Nos ta mira hopi mayor cu ta profesional, no docente, pero cu ta ingeniero kimico cu ta prepara pa duna les di kimica, y ta duna cualkier otro materia,” Fausto Romeo, Presidente di e Asociacion di Instituto Priva ta conta.
