E mayoria di e partidonan aglomera den MUD ta pensa di no participa na eleccion presidencial di 22 di april.
E decision ta basa riba e debatenan interno di Accion Democratica, Primero Justicia y Voluntad Popular, organisacionnan cu no ta di acuerdo cu duna balor na e proceso electoral cu ta tuma luga mas tempran pa decision di e Asamblea Constituyente cu nan ta considera ilegitimo, y convoca pa Conseho Nacional Electoral (CNE) sin e garantianan cu e oposicion a exigi na mesa di negociacion recientemente na Republica Dominicana.
“No tin condicion ni garantia pa participa na eleccion presidencial bao di e terminonan cu CNE ta pone,” un dirigente opositor a expresa.
E decision di e partidonan cu ta forma mayoria di e aliansa opositor no a ser haci oficial ainda ayera mainta y ta spera e anuncio pronto. “Di tur manera ta improbabel cu e decision lo cambia, mirando cu pa Accion Democratica e decision ta ireversibel. Ta imposibel duna validez na un contienda electoral sin observacion internacional, sin garantia pa e registro electoral, y sin e auditoria y resto di condicion cu nos y hasta e Conferencia Episcopal a exigi,” un dirigente di AD a bisa.
E secretario di Asamblea Nacional, Negal Morales (AD), a bisa dialuna cu oposicion a traha hunto pa logra e garantianan electoral cu ta den Constitucion. El a insisti cu si no ta duna validez na e eleccion presidencial di april, anto mester crea un frente nacional pa organisa e pais.
Cerca Primero Justicia e rechaso di bay eleccion presidencial ta uni na e esfuersonan di su coordinador nacional, Julio Borges, di denuncia e iregularidadnan di e proceso cerca comunidad internacional. Nan ta señala cu e debate no ta cera y cu nan ta coordina esfuerso pa e strategia di no participa inclui tambe un plan coherente di accion.
Fuentenan di MUD a afirma cu e anuncionan lo ta oficial ora nan logra concilia postura cu Henri Falcon, ex-gobernador di Lara, cu no a renuncia su aspiracion di lucha pa drenta Miraflores.
