Un masacre a tuma lugar den prision di Guanare, estado Portuguesa, diabierna pasa, despues cu segun autoridadnan penitenciario lo tabatin un intento di huy di e centro. Esaki lo a hiba na un intercambio di tiro entre e presonan y guardianan di e lugar.
Sin embargo, e por lo menos 50 mortonan registra durante e suceso tabata preso y no a reporta ningun victima mortal entre e personal di e prison, cu tabata na trabao na momento di e suceso.
E Comisionado pa Derecho Humano y Atencion di Victima di presidencia interino, Humberto Prado, a declara encuanto e masacre den Centro Penitenciario de Los Llanos (Cepella), destacando cu tabatin mas di 50 preso mata y mas di 70 herido, di cual 20 gravemente herida.
El a informa cu segun informacion di famia di e presonan, e motin a cuminsa pasobra e guardia y funcionarionan di e centro tabata keda cu parti di e cuminda cu famia di e presonan tabata manda pa nan.
El a indica cu debi na e situacion tenso e director di e centro penal a keda herida, y como respuesta, “di parti di autoridadnan a masacra e presonan,” el a bisa.
Prado, ken a solicita un investigacion extenso di e hechonan, lo deposita un denuncia cerca Alto Comisionado di Derecho Humano di Nacionnan Uni, Michelle Bachelet , cerca Secretario Ehecutivo di CIDH Paulo Abreu y Secretario General di OEA, Luis Almagro.
Un mama tabata conta cu su yiu tabata entre e fayecidonan den e motin, y cu e tabata wardando ainda pa haya huicio pa por sali di prison: “Cuatro aña mi yiu a keda di cumpli cera y nunca el a haya huicio. Mi tabata spera cu nan ta dun’e huicio pa mi por sa ki tempo e tabata por ta cu mi atrobe, pero awor mi tin cu hib’e morto,” el a comenta.
