(LaPatilla/Talcual) – Poblacion Venezolano lo no ta beneficiando di e mehoracion den produccion di combustible na e refinerianan di e pais, debi cu bon parti di e produccion ta sea bay pa aliado politico Cuba, o ta desaparece den mercado clandestino.
Den ultimo dos siman e rijnan na pomp di gasolin a crece den henter e pais, pero hopi pomp ta keda cera tambe y otronan ta habri algun ora so, te merdia. Mientras tanto, representantenan di sector agricola ta adverti cu tin e riesgo di un escasez di producto den sector agricola debi na falta di diesel pa produci y transporta cuminda pa e centronan urbano mayor.
Ivan Freites, secretario di Profesional y Tecnico di Federacion Unitario di Trahador Petrolero di Venezuela (FUTPV), a informa cu e Centro Refinador Paraguana (CRP) ta produciendo 80,000 bari pa dia (bpd) di gasolin (20.000 bpd na Puerto La Cruz y 60.000 bpd na Cardon); como tambe 75.000 bpd di diesel.
“Si, tin mas gasolin, si, tin mas diesel, pero 50% ta bay pa Cuba y e otro 50% e militarnan ta hiba a traves di PDV Puertos. Nan ta distribuyendo e combustible. Nunca lo tin stabilidad, mientras ta existi un mercado clandestino maneha pa militar y Cubano, y mientras tambe ta bende gasolin na 5 dollar pa litro y diesel na 4 dollar,” Freites a dencuncia.
Na comienzo di juni, varios reporte di embarque di Pdvsa a revela cu e administracion di Nicolas Maduro ta continua cu manda diesel pa isla di Cuba. Un informe di Caracas Capital a indica cu 159.445 bari di combustible a bay riba e barco Alicia dia 2 di juni pa puerto di Matanzas.
Freites a conta cu, aunke e mehoracion den produccion di diesel y gasolin ta pa via di varios unidad cu a cuminza opera atrobe, e proceso no tin stabilidad y despues di opera algun siman, ta para operacion atrobe pa algun siman.
