(ElNacional) – Mas di dos mil opinion y preocupacion di victimanan Venezolano pa presunto crimennan inhumano cometi den teritorio Venezolano a wordo ricibi pa e Fiscalia di e Corte Penal Internacional (CPI), como parti di e investigacion cu e organismo ta realisando riba Venezuela.
E seccion pa e participacion di victima y e reparacion (VPRS) a informa den un actualisacion ariba e caso Venezuela I, cu e periodo pa recoge e opinionnan di e victimanan a finalisa diamars dia 7 di maart ultimo.
El señala cu hopi di e formularionan cu a wordo manda via carta, video y otro tipo di presentacionnan, no a wordo revisa ainda den su totalidad debi na e cantidad grandi di peticionnan.
El a agrega tambe cu nan ricibi un cantidad grandi di informacion durante e prome siman di maart, na momento cu e plaso cu a wordo duna na e victimanan pa expresa nan opinion- of peticionnan na e sala di cuestionnan preliminar 1 tabata cerando.
Aunke e seccion pa e participacion di e victimanan mester a recopila tur e opinionnan y procesa nan den un rapport cu lo wordo presenta na e sala di cuestionnan preliminar mas tarda dia 21 di maart di 2023, e instancia a pidi un extension te cu dia 20 di april pa analisa y procesa e formulario- y videonan hunto cu e rapport final consolida.
“Tur e informacion ricibi ta wordo maneha di manera estrictamente confidencial. E VPRS a registra e informacion proporciona den un data base sigur na cual solamente e personal autorisa di e registro di CPI tin acceso na dje. E formularionan di e victimanan, video, etc. lo wordo transmiti solamente den e sala di cuestionnan preliminar; ningun otro entidad tin acceso na e informacion,” e organismo a indica.
Nan a aclaria cu e gobierno di Venezuela no tin acceso na ningun formulario, video, otro documentonan presenta pa of den nomber di e victimanan, mientras cu e version publico di e rapport final tampoco lo tin ningun tipo di identificacion.
“E seguridad di e victimanan y di esnan cu ta yuda nan ta primordial. E victimanan no mester core ningun riesgo y no mester menciona publicamente nan interaccion cu CPI, ya cu e confiansa y discrecion ta e miho manera di proteha nan den e etapa aki di e procedemento,” el a conclui.
