(LaPatilla/ElNacional) – Segun Centro di Documentacion y Analisis Social di Federacion Venezolano di Maestro (Cendas-FVM), a informa cu e trahadornan na Venezuela por cubri solamente 3,5% di e canasta basico familiar cu nan salario. Valor di e canasta a keda estableci na US$446,63 na september.
Di acuerdo cu Cendas, Venezolanonan mester di e equivalente di 28,3 salario minimo pa por cubri e canasta basico pa cinco persona. E entidad a splica cu e salario minimo actual stipula pa gobierno di Nicolas Maduro na 130 bolivar pa luna, ta equivalente di 15,7 dollar. Cu esaki, miyones di trahador y pensionado por cubri solamente 3,5% di e canasta alimentario familiar.
E promedio di e costo di e canasta basico pa luna di september ta representa un mehoracion leve di 2,8% compara cu luna di augustus, unda e canasta basico tabata na US$459. Sin embargo, no ta un cambio significativo pa poder di compra di e Venezolanonan.
Den otro informacion encuanto situacion economico, Observatorio Venezolano di Finanzas a informa encuanto e inflacion acumula durante promer nuebe luna di 2022, cu a yega na 111,8%. Di e manera aki, e bolivar a perde casi mitar di su valor den ultimo 12 luna. E tendencia aki ta continuo, mientras cu produccion den practicamente tur sector a disminui enormemente den ultimo decada, limitando exportacion y por lo tanto limitando acceso na divisa, mientras cu importacion a expande mas pa cubri e parti di produccion no disponible mas riba mercado local.
E elementonan aki tin relacion cu e indicenan halto di pobreza cu Venezuela ta registra awe, unda gran parti di e poblacion tin dificultad pa yega na alimento, medicamento o servicio di salud.
