Den prome cuatro luna di 2019, a detene mas di 2.000 persona na Venezuela, e mayoria den cuadro di e protestanan contra gobierno di Nicolas Maduro, asina e organisacion no gubernamental (ONG) Foro Penal, cu ta vigila derecho humano, a denuncia diamars pasa.
“Desde prome di januari te na mei 2019 a tuma luga 2.014 detencion, fundamentalmente persona cu tabata protesta,” Alfredo Romero, director di Foro Penal, a declara den rueda di prensa, unda el a critica regimen di Nicolas Maduro. Segun Romero, te na e fecha ey tin ainda 757 civil y 100 militar deteni.
Dia 30 di april, e lider opositor Juan Guaido, reconoci como presidente interino di Venezuela pa mas di cincuenta pais, a encabesa e lantamento di un grupo chikito di persona uniforma, cu Maduro a denuncia como un intento di golpi di estado.
Di acuerdo cu Foro Penal, a aresta 338 civil y militar despues di e rebelion. “A keda priva di nan libertad 82 persona,” Romero indica.
Fiscalia a conta“aproximadamente 233 persona deteni” relaciona cu e rebelion, como tambe cinco morto durante manifestacionnan opositor di apoyo na e accion ey y protestanan di dia 1 di mei. Tambe e organismo hudicial a solicita 18 orden di captura contra “civil y militar involucra den e complot.”
