Un cantidad di pashent di riñon a denuncia cu debi na falta di awa den e centronan medico, no por realisa e tratamento, loke ta haci nan calidad di bida mas dificil.
“Ya nos tin material, nos tin enfermera, tur cos ta na ordo, pero nos no tin awa; seguro social no kier nada cu nos, alcaldia ni hende di Barrio Adentro, nos a manda carta y nada,” Jose Ruiz, pashent di dialyse di un di e centronan asistencial, ta bisa.
A informa cu tin mester cu urgencia un truck di awa tur siman, pa por lo menos garantisa e tratamentonan manera e dokternan ta indica.
E situacion den centronan medico ta grave. E pashentnan y nan famia di hospital JM de los Ríos a dicidi di realisa un protesta ayera, pa pidi atencion pa e caso di e alrededor di 30 mucha cu mester transplante medular, mientras cu 4 di nan a fayece caba sin haya yudansa.
Gobierno di Nicolas Maduro a bisa na varios ocasion cu ta e “blokeo economico” imponi pa gobierno di Merca no ta permiti paga e debenan cu nan tin cu Italia, pais cu cual Venezuela tabatin un convenio pa haci transplante medular, te 2018.
Sin embargo, loke gobierno no ta reconoce ta cu e problema na J.M. de los Ríos no ta reciente y cu e programa ta presenta fayo desde 2015 caba. Den seccion di Hematologia tin pashent cu tin mas di un aña ta wardando riba un transplante medular.
