Fayo den suministro di energia na e pais y un caida den prijs di petroleo mundial a causa contratiempo pa e plannan di e empresa estatal Pdvsa pa produci crudo mehora, segun un documento cu Reuters y tres persona cerca di e compania a haya pa mira.
E crudo extra-pisa di e zona petrolero mas grandi di Venezuela, e Faha di Petroleo di Orinoco, mester keda mezcla cu crudo mas liviano prome cu por exporta esaki. E operacionnan aki ta tuma lugar den cuatro mehorador y un instalacion di mezcla cerca di e terminal di Jose, na parti oriental di e pais.
E siman aki e mehorador Petropiar, parti di un ‘joint venture’ entre Pdvsa y Chevron Corp, a stop di produci crudo sintetico mehora, debi na un fayo den suministro di electricidad y ta operando como un instalacion di mezcla menos compleho, e fuentenan a conta bao condicion di anonimato. Petropiar a opera gran parti di 2019 como un instalacion di mezcla, pero Pdvsa a reanuda e operacion di mehoracion na inicio di aña.
Ademas, Pdvsa a retrasa e plannan pa activa e mehoradornan di Petromonagas y Petrocedeño, paralisa durante hopi tempo, pa sirbi como planta di mezcla debi na e caida den prijs mundial di petroleo, como resultado di caida den demanda pa via di coronavirus. Petrocedeño, un empresa tipo ‘joint venture’ entre Pdvsa, Total di Francia y Equinor di Noruega, tabata programa pa reinicia operacion na mei y Petromonagas na juli.
Petromonagas ta un empresa conhunto entre Pdvsa y Rosneft di Rusia, cu na maart a bende su propiedadnan na Venezuela cu un firma estatal Ruso no identifica. E contratiempo ta bin na momento cu produccion di crudo di Venezuela a cay bao di 700.000 bari pa dia (bpd) den ultimo simannan, mas di 20% compara cu comienso di aña, debi na sancion Mericano y caida di prijs. Pdvsa ni ningun di e socionan a responde riba solicitud pa comentario.
