E marcha di oposicion organisa ayera na Caracas, cu a sali di plaza Juan Pablo II na Chacao a topa cu un blokeo di Polis Nacional Bolivariano (PNB) riba avenida Francisco Solano cu a impedi nan paso.
E multitud, dirigi pa presidente interino Juan Guaido, hunto cu diputadonan di Asamblea Nacional, tabatin intencion di yega na sede di Asamblea pero no por a pasa. E lidernan a purba dialoga cu e funcionarionan di seguridad di estado pa nan habri paso pa e marcha.
Sin embargo, un grupo di persona a cuminsa tira obheto riba efectivonan di PNB y nan a responde tirando bom lacrimogeno riba e manifestantenan.
“Awe ta keda un biaha mas bon cla cu e dictadura ta prohibi e diputadonan pa yega na Palacio Federal Legislativo. Nos a logra nos obhetivo, nos a yega te aki y nos a demostra cu e regimen tin miedo,” Guaido a declara na e presentenan algun momento prome cu e represion a cuminsa.
El a sigura cu aunke no a logra yega na Palacio Federal Legislativo, di igual forma lo a realisa e sesion di Asamblea Nacional riba caya.
“E obhetivo di awe ta pa tene e sesion, e dictadura cu su militarisacion no lo bay impedi esey,” Guaido a bisa. E Asamblea Nacional legitimo a tene un sesion cerca di plaza Alfredo Sadel di Las Mercedes na municipio Baruta, y a aproba loke a yama e ‘Pliego Nacional de Conflicos,” un propuesta pa reactiva e protestanan publico contra e dictadura.
Guaido a dirigi palabra tambe na e cuerponan di seguridad y a acusa nan di ta complice di e regimen di Maduro. El a bisa cu nan tambe ta sufri den e crisis di e pais y por lo tanto mester pasa pa banda di e pueblo.
