E presidente interino di Venezuela, Juan Guaido, a ofrece un rueda di prensa ayera, hunto cu directiva di Asamblea Nacional, despues di e persecucion di prome vice-presidente diparlamento, Edgar Zambrano, acusa pa Tribunal Supremo Chavista di responsabilidad di e mortonan durante e manifestacionnan di 30 di april y 1 di mei.
El a indica cu e marcha programa pa diasabra 4 di mei ta bay den direccion di e instalacionnan militar di manera pacifico y civilisa.
“Nos no ta bay pa demostra,(…), nos ta bay pa entrega un documento, un proclamacion na Forsanan Arma Nacional pa nan scucha e peticion di pueblo Venezolano”, el a declara. “Nos sa cu nos mester continua cu e protesta. Operacion Libertad mester sigui civicamente.”
Nos no ta pidiendo e militarnan pa pasa pa mi banda. Nos ta pidiendo pa nan pasa pa e banda di pueblo, di nan pais, pa banda di constitucion y esey mester duna nos eleccion liber. Ta trata di esey, di bida,” Guaido a insisti.
Encuanto e situacion di diputado Edgar Zambrano, despues di e acusacion di Tribunal Supremo di Maduro, Guaido a reafirma cu “e no ta culpabel di e sucedido y Asamblea Nacional tampoco ta responsabel, al contrario, nos a propone solucion. Mi ta lamenta morto di cuatro Venezolano cu, buscando solucion, a perde nan bida. Al menos 271 Venezolano a ser asesina simplemente pa protesta mientras Maduro ta usurpando poder na Miraflores,”Guaido a expresa.
“Ta bay tin husticia pa e hobennan ey cu a ser asesina inhustamente, e muchanan ey cu a sali pa busca nan soñonan”, el a agrega.
