(ElNacional) – Centenares di maestronan na Venezuela a bolbe sali riba caya ayera, dia cu ta conmemora su dia na e pais, cu e obhetivo di exigi e gobierno di Nicolas Maduro e reanudacion di e negociacionnan pa un contract colectivo nobo.
E presidente di e Federacion Venezolano di Maestronan (FVM), Carmen Marquez, a sigura cu despues di dos aña di discusion di e contract laboral, durante cual nan a establece 17 clausula, e gobierno a paralisa, di manera unilateral, e negociacion.
“Nos ta exigi e gobierno nacional e reinicio di e discusion di e contract colectivo, esey ta e punto di honor di e organisacionnan sindical. E maestro no por sigui gana un miseria di sueldo,” el a expresa, durante un protesta na Caracas, den e di dos dia di manifestacionnan di trahadonan di e aña aki, cu a cuminsa dia 9 januari.
“Pa un salario digno y un contract colectivo husto,” tabata un di e mensahenan mas comun skirbi ariba posternan cu trahadornan tabatin den e actividad aki, respalda pa trahadornan di otro sectornan, durante cual tambe nan a canta slogannan relaciona cu nan reclamonan.
Marquez a manifesta e disposicion di e gremio na dialoga cu e autoridadnan educativo pa sigui discuti e contract colectivo y a exigi na gobierno garantisa un educacion di calidad y un salario digno pa e maestronan pa nan por tin un bida digno.
Den e sentido aki, el a sigura cu e calidad di educacion depende cu tin maestronan bon paga, como tambe scolnan den bon condicionnan.
El a denuncia cu e 60% di e scolnan ta den mal condicion, y a exigi pa nan garantisa e servicionan basico y alimentacion escolar.
Segun e FVM, algun educador di e sector publico ta gana salario minimo cu ta wordo fiha pa e Ehecutivo na 130 bolivar, ekivalente na alrededor di 3.61 dollar pa luna, y esunnan di nivel mas halto ta gana alrededor di 22 dollar pa luna, mientras cu e basket basico di alimento, pa un famia di cinco persona, tin un costo di 522 dollar, segun calculacionnan di gremio.
E Federacion di Asociacionnan di Profesornan Universitario di Venezuela (FAPUV) a sinta dialuna pa defende, di manera unitario y masivo, e derechonan laboral dilanti e atake gubernamental contra educacion.
