(ElNacional) – Presidente di Venezuela, Nicolas Maduro, y su colega presidente di Colombia, Gustavo Petro, a celebra diahuebs ultimo un reunion express na Caracas, for di cual ambos mandatario a sali sin ofrece declaracion. Esaki ta e di tres encuentro entre e presidentenan desde cu Petro a asumi su cargo.
E canal estatal Venezolana de Television (VTV) a transmiti, durante un minuut y mey, e imagennan di e despedida entre Maduro y Petro y su delegacion, cu tabata consisti di su minister di Asuntonan di Exterior, Alvaro Leyva y e hefe di su oficina, Laura Sarabia.
Asina a culmina, segun e medio publico, un agenda di trabou desaroya cu e proposito di avansa den e relacion di cooperacion strategico bilateral.
“E tabata un reunion productivo y calido di trabao,” Maduro a bisa despues brevemente a traves di su cuenta di Twitter, durante cual e sigura, nan a propone pa profundisa e aliansanan bilateral, locual, segun e mandatario, nan ta logrando cu union y perseverancia.
E reunion di diahuebs ultimo na Caracas tabata un reunion pa haci siguimento ariba cuestionnan aborda durante e encuentronan anterior, segun e presidencia di Colombia a indica.
Un di e temanan trata tabata e lucha contra e narcotrafico y e colaboracion na e frontera cu ambos pais ta comparti. Ademas nan a combersa tocante e apertura di, aproximadamente, 15 consulado di Colombia na Venezuela, di cual un ta habri caba na Caracas, y tocante e celebracion, na mei, di un cumbre di paisnan Amazónico y Francia pa discuti tocante e selva tropical mas grandi di mundo, den marco di e Organisacion di e Tratado di Cooperacion Amazonica (OTCA).
