Nicolas Maduro, despues di e noticia di e caida di su amigo Evo Morales na Bolivia, a activa su apoyantenan ayera pa ‘defende paz’, catalogando e sucedido como un “golpi di estado” manera e otro regimennan izquierdista riba e continente tambe a haci.
“Mi ta reitera mi yamado na e movimentonan popular, social, sindical, (…) y henter nos pueblo pa mantene nan mes alerta, uni y den mobilisacion permanente pa defende e derecho soberano di nos pueblonan di paz y libertad,” Maduro a laga sa via su cuenta di Twitter.
Diadomingo Maduro a expresa cu “Nos ta condena categoricamente e golpi di estado contra e presidente ruman Evo Morales.”
Di su parti e segundo homber fuerte di e regimen Venezolano, Diosdado Cabello, den su rueda di prensa di Partido Socialista Unido de Venezuela (Psuv), a papia di e reaccionnan cu a surgi na Bolivia despues di e renuncia di Evo Morales.
Diosdado a sigura cu “Bolivia tin presidente, no pa un periodo, sino pa dos, nos ta apoya pueblo Boliviano y Evo Morales.” E presidente di e Asamblea Constituyente Chavista a bisa cu “loke a sucede na Bolivia ta viola su constitucion.”
“Awor nos ta bay pa Venezuela? Aki nos ta warda nan (…) bao di e premisa ey nos por afirma cu nos ta bay pa Brasil, pa Merca, tur cos tin su tempo, pueblonan lo lanta.” Tambe el a resalta cu “pa esnan cu ta kere cu tur cos a caba na Bolivia, nan por hiba un gran sorpresa.”
