Nicolas Maduro aparentemente a activa su plan pa elimina o neutralisa Asamblea Nacional como e principal factor di poder cu e no ta controla. Un serie di atentado contra miembrona opositor, a traves di secuestro y eliminacion di inmunidad parlamentario y orden di aresto, ta combina cu intento pa dividi oposicion anti-Chavista,cu e proposito pa haci re-eleccion di Juan Guaido mas dificil. Dia 5 di januari proximo Asamblea Nacional lo mester eligi su presidente y re-eleccion di Guaido no ta sigur.

E accionnan di Maduro no a keda sin respuesta. Tanto Alto Comisionado di Nacionnan Uni pa Derecho Humano, Michelle Bartelet, como Union Europeo y Merca a expresa nan rechaso pa e atentadonan di e regimen contra e unico organismo estatal reconoci internacionalmente como eligi legitimamente. Ni presidencia di Maduro, ni su Asamblea Nacional Constituyente o su Tribunal Supremo di Husticia tin tal reconocimento, pero ta colabora na un manera escandaloso den e atakenan contra e Asamblea Nacional legitimo.

Di e diputadonan persigui pa e regimen, mester menciona Juan Requesens, cu a pasa mas di 500 dia bao aresto, acusa di cierto papel den e atentado cu un drone contra Maduro y alto mando militar. Bachelet a haci un yamada pa laga Requesens liber, argumentando cu e grupo di trabao di Nacionnan Uni a yega na conclusion cu su aresto tabata arbitrario.

Siman pasa diabierna, un dia despues di e accidente aereo cu varios victima liga na e top politico Chavista, a sucede e secuestro di diputado Gilber Caro, y te awor no tin reconocimento di su paradero. Ademas por suma e casonan di Edgar Zambrano, Renzo Prieto, Rosmit Mantilla y Gilberto Sojo, tur preso actualmente. Jorge Millan, Hernan Aleman, Carlos Lozano, Luis Stefanelli, Yanet Fermin y Fernando Orozco a ser acosa pa e dictadura den ultimo dos siman y a perde nan inmunidad parlamentario y ta refugia na algun luga na Venezuela.

Fermin a keda salba pa Guaido personalmente, cu a presenta na su vivienda cu varios otro opositor ora hendenan di Maduro a yega pa secuestra e diputado. Nan no a tribi mishi cu Guaido ni cu ningun otro na e ocasion ey. Un accion contra Guaido lo por a desencadena un reaccion internacional cu hasta Maduro ta teme. “E homber cu ta papia cu pahra ta parce di conoce su limite,” Infobae ta opina.

Actualmente, di 167 diputado, 32 a keda deteni, forza den exilio o a mira nan inmunidad parlamentario constitucional revoca,” Elliott Abrams, Representante Special Mericano pa Venezuela, a comenta. Ademas el a denuncia e intentonan pa soborna algun parlamentario cu mita miyon dollar cada un.