E gobernante Venezolano Nicolas Maduro a haci diamars pasa un yamada na oposicion pa yega na un “altoal fuego”, cu referencia na e constante conflictonan entre ambos banda, y yega na un acuerdo humanitario cu lo faborece e labornan medico pa frena expansion di Covid-19.
Maduro a haci e declaracion durante un reunion televisa cu e comite gubernamental encarga cu frena e propagacion di e coronavirus.
Pa esey, el a dirigi su mes na tur forza politico di e pais, pidiendo nan pa “pone tur diferencia un banda” y pone nan mes “di acuerdo pa Venezuela den un gran acuerdo humanitario di salud y paz”.
Maduro a encarga vice-presidente y ministro di comunicacion, Jorge Rodriguez, cu e contactonan cu, segun el a sigura, ya nan “a informa cu nan ta cana bon” y cu posiblemente lo por tin bon noticia den e proximo dianan.
Di otro banda, Maduro a mustra disposicion pa ricibi ayudo Mericano y a nenga cu el a rechasa anteriormente ayudo di e pais ey. E ta dispuesto, segun su declaracion, pa ricibi ayudo humanitario a traves di Organisacion Mundial di Salud (OMS/WHO) y Organisacion Panamericano di Salud (OPS/PAHO).
Tambe el a bisa cu gobierno Mericano “tine desfachatez di bisa cu nan ta e mayor donante di ayudo na Venezuela” y a puntra su mes “unda?”, pasobra e apoyo ey “nunca a yega”.
Finalmente el a declara cu si Merca a manda placa, lo ta “a traves di oposicion” y Guaido, y cu nan lo a hort’e.
Maduro a referi tambe na un yamada di Nacionnan Uni pa para tur conflicto arma na mundo durante e pandemia di Covid-19. Sin embargo, na Venezuela tin un conflicto cu un banda so ta arma, esun di e dictadura di Maduro.
