Diabierna pasa Nicolas Maduro a anuncia su plan nobo pa distribucion di gasolin cu a importa di Iran, y a establece un sistema di importacion y benta priva na persona particular na 200 stacion di gasolin den henter e pais.
Tambe a introduci medida pa distribucion na vehiculo particular di gasolin subsidia, segun e sistema di “pico y placa” segun e ultimo number di plachi. E sistema ta tal cu solamente tin dos ultimo number por tuma gasolin pa dia, y ta tarda cinco dia pa atende tur vehiculo. Tin un sistema di subsidio pa publico general na tur stacion na un prijs di 5.000 bolivar pa litro. (Actual valor di bolivar ta alrededor di 200.000 pa 1 dollar). E subsidio ta obtenible solamente via e plataforma y carnet di patria. Consumo ta limita na 120 litro pa auto y 60 pa motorcycle. E medida ta pa 30 dia, cu speransa cu abastecimento lo normalisa den e periodo ey.
Pa transporte publico lo tin subsidio total. Tambe a designa 200 stacion di gasolin pa benta y distribucion liber di gasolin na prijs internacional. E combustible lo tin un prijs di US$0,50 pa litro. No a specifica e prijs na bolivar, pero ta supone cu esey lo ta e prijs cu Banco Central di Venezuela ta indica pa cambio di dollar.
Pa e ultimo medida aki, Maduro a anuncia libertad di importacion, benta y distribucion di gasolin pa empresanan priva. Esaki di tal forma cu tur esnan cu ta desea di inverti den importacion di gasolin por haci esey, pero mester bende esaki na e prijs stipula di 50 cent di dollar. Cu e medidanan aki, Maduro ta tuma un paso inusual pa un politico socialista, di liberalisa parti di e mercado, bao presion di circunstancia.
