(LaPatilla/EFE) – Regimen di Nicolas Maduro a pidi Cepal studia e impacto di “medidanan coercitivo” di Estadonan Uni.
“Nos ta proponiendo na Cepal un estudio di e impacto di e medidanan coercitivo unilateral, no solamente internamente, di economia di Venezuela, sino (…) na nivel di e region,” asina vice-ministro pa Tema Multilateral di Ministerio di Poder Popular pa Relacion Exterior di gobierno, Ruben Dario Molina, a declara.
Estadonan Uni a impone sancion riba regimen Chavista desde 2017, durante gobierno di Donald Trump (2017-2021), cu a inclui prohibicion di comercializa bono di Tesoro Venezolano den mercadonan financiero Mericano, haci negoshi cu e empresa estatal Pdvsa y sancion riba funcionarionan Chavista.
Riba e segundo dia di e di 39 periodo di sesion di Cepal, cu ta tuma lugar na Buenos Aires, e funcionario Venezolano a declara cu “e medidanan coercitivo ta hunga un papel clave, fudamental” contra su pais. Pero tambe e tabata kier a yama atencion di e region ya cu e medidanan contra Venezuela no ta contra Venezuela so, sino cu “pa Venezuela por contribui dentro di e region cu tur su potencialidad, ta e medidanan ta impedi esey”.
Y el a recorda tambe cu na Europa nan tin gran necesidad di energia y cu Venezuela ta hunga un papel “fundamental” cu e reserva di petroleo mas grandi di e region y un di cinco lugar entre pais cu gas.
Molina a adverti cu midi Venezuela “cu e mesun indicadornan cu un pais cu no tin medida coercitivo unilateral ta imposible” y “no ta viable” pa haci manera cu tur pais ta comparti e mesun standardnan. E vice-ministro Venezolano a referi tambe na e “bloqueo” cu Cuba ta sufri desde 60 aña cu “tambe tin impacto den e region”.
