Presidente ‘de facto’ Nicolas Maduro a anuncia diaranson pasa durante declaracion na television y radio den cadena nacional, cu e actividadnan educativo na e pais lo reinicia desde september proximo bao di e modalidad di ‘online’ debi na e pandemia di coronavirus cu presente den henter e pais.
E mandatario a declara cu su anuncio ta pa habri un debate tocante “kico ta parce boso un modalidad cu ta combina lo presencial cu internet”. El a sigura cu e debate cu ta realisa ta propone si desde october o januari di otro aña lo por implementa un modalidad cu ta permiti asistencia di mucha na e klasnan y educacion di distancia.
E anuncio di e mandatario en berdad a causa bastante comentario negativo den medionan social, unda tur e actual problemanan cu ta dificulta enseñanza online a bin dilanti. Cu e grado di pobreza genera den ultimo decada, tin hopi famia cu ni tin di come, te pa tin placa pa computer y internet. Ademas den hopi bario no tin servicio continuo ni di internet, ni di coriente, ni di awa, ni di telefon, segun hopi di e comentarionan
Tambe ta bisa cu mester tene cuenta cu tabatin un exodo grandi di maestro y docente pa motibo di e condicionnan di trabao, entre nan e salario cu pa via di hiperinflacion a keda devalua na nivel di algun dollar. E proceso aki ya tin algun aña andando, y e pandemia a haci e situacion mas grave ainda.
