E aire di speransa cu tabatin siman pasa, y cu tabata indica un acuerdo cu lo a permiti convoca eleccion liber na Venezuela, a bolbe bira incierto. E corant Clarin di Argentina a tene un entrevista cu un di e miembronan di e Grupo di Contacto organisa riba iniciativa di Union Europeo, e vice-ministro di Relacion Exterior di Italia, Ricardo Merlo, cu a duna un bista riba e reunion cu e Grupo a sostene cu Nicolas Maduro diahuebs pasa.

E mision di e Grupo di Contacto internacional a reuni tanto cu e dirigentenan mas halto di Chavismo, como tambe cu oposicion, pa sondea e posibilidad di yega na un acercamento, pero e resultado tabata adverso, particularmente pa e posicion rigido di Nicolas Maduro y e top di gobierno Chavista.

Ricardo Merlo:“Mi a mira Juan Guaidó, Henrique Capriles y otro dirigentenan di oposicion dispuesto pa logra un apertura democratico, inclusive aceptando renobacion di parlamento. Pero Maduro mi a mir’e cu hopi duda di por yega na eleccion liber.”

E Grupo di Contacto, aunke critico pa loke ta politica di Maduro, ta considera mas modera cu e Grupo di Lima, y tabatin e speransa di por hunga un papel di mediador pa logra un “solucion pacifico y democratico den man di e Venezolanonan mes.”

Pero e mision di siman pasa no a resulta manera a spera, y e grupo a keda desanima. Nan a emiti un comunicado conhunto hopi diplomatico, a traves di cual nan a purba keda bon cu ambos banda.

Segun cu Clarin a logra haya sa, e realidad tabata mas incomodo di loke a premira. Nan tabata cerca Maduro un ora y mey, pero e prome ora e mandatario a usa pa un discurso cu su habitual repertorio. Tabatin solamente mey ora pa dialoga.

El a cuminsa na yama Leopoldo Lopez pa “fascista” pa despues yama Guaido “neofascista”. Pero loke mas a sorprende e delegacion ta cu Maduro a describi su mes como “centro moderado”.

Maduro a adverti cu Estadonan Uni tabata preparando un invasion, y cu e por conta cu dos miyon miliciano pa defende su mes, asina el a conta e delegacion Europeo. Nan no a haya e impresion cu Maduro sikiera ta considera un salida negocia.

“Nos a pidi Maduro eleccion lo mas rapido posibel, pero eleccion democratico, transparente, controla pa organismonan internacional. Na cierto momento mi a puntra si nan sa haci algun autocritica, y nan a keda keto. Nan a tarda un rato pa responde, y no a bisa nada concreto.”